2011, മേയ് 19, വ്യാഴാഴ്‌ച

ഇവരാണത്രെ കൂടുതൽ ഈ അനാഥഗ്രഹങ്ങൾ



credit: NASA

     അലഞ്ഞു നടക്കുന്നവർ എന്നാണ് planet എന്ന വാക്കിന്റെ അർത്ഥം എന്ന് പ്രൈമറി ക്ലാസുകളിലെവിടെ നിന്നോ ആണ് നാമറിഞ്ഞത്. എന്നാൽ പിന്നീട് നാമറിഞ്ഞു ഇവർ വെറുതെ അലഞ്ഞു നടക്കുന്നവരല്ല എന്നും സ്വന്തമായ വൃത്തങ്ങൾ കൃത്യ സമയം വെച്ച് പൂർത്തിയാക്കുന്നവരാണ് എന്നും.അവർക്കു നിശ്ചയിച്ച വഴികളിൽ കൂടി മാത്രമേ അവർ സഞ്ചരിക്കൂ എന്നും ഇന്ന് നമുക്കറിയാം. എങ്കിലും ഇന്നും നമ്മൾ അവരെ planets എന്നു തന്നെ വിളിച്ചു കൊണ്ടിരിക്കും. ഒരിക്കലിട്ട പേര് പിന്നീട് സ്വഭാവമറിഞ്ഞതിനു ശേഷം മാറ്റാറില്ലല്ലോ. എന്നാൽ ശരിക്കും അലഞ്ഞു നടക്കുന്ന ഗ്രഹങ്ങളെ കുറിച്ച് കുറെ വിവരങ്ങളുമായി എത്തിയിരിക്കുന്നു ജപ്പാനിലെയും ന്യൂസിലാന്റിലെയും ഒരു സംഘം ശാസ്ത്രജ്ഞര്‍.

      ഒരു നക്ഷത്രത്തിനു ചുറ്റും കറങ്ങുന്ന ഗ്രഹങ്ങളെ കുറിച്ചാണ് നാം പഠിച്ചിട്ടുള്ളത്. എന്നാൽ സ്വന്തമായി ഒരു നക്ഷത്രം പോലുമില്ലാതെ നക്ഷത്രാന്തര സ്ഥലത്ത് അലഞ്ഞു നടക്കുന്ന പത്തിലേറെ അനാഥഗ്രഹങ്ങളെയാണ് ഇപ്പോൾ കണ്ടെത്തിയിരിക്കുന്നത്. നക്ഷത്രങ്ങളെ പോലെ ഗാലക്സി കേന്ദ്രത്തെയാണ് ഇവ പ്രദക്ഷിണം ചെയ്യുന്നത്. വ്യാഴത്തെക്കാൾ വലിയ വാതകഗ്രഹങ്ങളാണിവ. ആദ്യകാലങ്ങളിൽ ഇവയെ നക്ഷത്രങ്ങളാകാൻ കഴിയാതെ പോയ തവിട്ടുകുള്ളന്മാരുടെ കൂട്ടത്തിലാണ് കൂട്ടിയിരുന്നത്. എന്നാൽ പുതിയ പഠനങ്ങൾ കാണിക്കുന്നത് ഇവക്ക് നക്ഷത്രങ്ങളെക്കാൾ സാമ്യം ഗ്രഹങ്ങളോടാണ് എന്നാണ്. നക്ഷത്രരൂപീകരണവേളയിലാണ് ഇവ രൂപം കൊണ്ടിരുന്നതെങ്കിൽ ഇപ്പോൾ പഠനം നടത്തിയ പ്രദേശത്ത് ഒന്നോ രണ്ടോ എണ്ണം മാത്രമെ കാണാൻ കഴിയുമായിരുന്നുള്ളു. ഈ എണ്ണക്കൂടുതൽ തന്നെയാണ് ഇവ ഗ്രഹരൂപീകരണവേളയിൽ ഉണ്ടായതായിരിക്കും എന്നതിന് ഒരു തെളിവായി ശാസ്ത്രജ്നർ പറയുന്നത്. ഈ അനാഥഗ്രഹങ്ങൾ ഏതെല്ലാമോ നക്ഷത്രങ്ങളുടെ ഗ്രഹവ്യവസ്ഥയിൽ നിന്നും പുറംതള്ളപ്പെട്ടവയാണത്രെ. ഇപ്പോൾ കണ്ടെത്തിയിരിക്കുന്നത് വ്യാഴത്തെക്കാൾ വലിയവയെയാണ്. എന്നാൽ ഇവയെക്കാളും എത്രയോ അധികമായിരിക്കുമത്രെ ചെറുഗ്രഹങ്ങളുടെ എണ്ണം.

      ആകാശഗംഗയുടെ മദ്ധ്യത്തിലെ ഒരു ഭാഗമാണ് Microlensing Observations in Astrophysics (MOA) എന്ന പേരിൽ അറിയപ്പെട്ട ഈ പഠനത്തിനായി തെരഞ്ഞെടുത്തത്. ഭൂമിയിൽ നിന്ന് 10,000 മുതൽ 20,000 വരെ പ്രകാശവർഷം അകലെയാണ് ഈ പ്രദേശം. ജപ്പാനിലെ ഒസാക്കാ സർവ്വകലാശാലയിലെ ഗവേഷകനായ തകാഹിരോ സുമിയും ന്യൂസിലാന്റിലെ മൗണ്ട് ജോൺ സർവ്വകലാശാലയിലെ ശാസ്ത്രജ്ഞരും ചേര്‍ന്നാണ് പഠനം നടത്തിയത് . ഈ സർവ്വകലാശാലയിലെ 1.8 മീറ്റർ ടെലസ്കോപ്പ് ഉപയോഗിച്ച് 2006, 2007 വർഷങ്ങളിൽ നടത്തിയ നിരീക്ഷണ ഫലങ്ങൾ വിശകലനം ചെയ്ത് ഇവർ എത്തിച്ചേർന്ന നിഗമനം പ്രപഞ്ചത്തിലെ ആകെ നക്ഷത്രങ്ങളെക്കാൾ കൂടുതലായിരിക്കും അനാഥഗ്രഹങ്ങളുടെ എണ്ണം എന്നാണ്. ചിലിയിലെ 1.3 മീറ്റർ ടെലസ്കോപ് ഉപയോഗിച്ച് Optical Gravitational Lensing Experiment (OGLE) എന്ന സംഘം നടത്തിയ പഠനവും MOAയുടെ നിഗമനങ്ങളെ പിന്തുണക്കുന്നുണ്ട്.

അവലംബം: Nature

2011, മേയ് 12, വ്യാഴാഴ്‌ച

പ്രഭാതസവാരി

credit: NASA

     പ്രഭാതസവാരി എന്നു പറഞ്ഞാൽ പ്രഭാതത്തിന്റെ സവാരി എന്നും ആകാമല്ലോ. ഒരു പ്രഭാതം ഇപ്പോൾ സവാരി നടത്തിക്കൊണ്ടിരിക്കുകയാണ്; കയ്യിലൊരു ക്യാമറയുമായി. ഇത്തിരിക്കുഞ്ഞന്മാരെ കുറിച്ചു പഠിക്കലാണു ലക്ഷ്യം.

     സൌരയൂഥത്തിലെ ഇത്തിരിക്കുഞ്ഞന്മാരാണ് ഛിഹ്നഗ്രഹങ്ങൾ അഥവാ ആസ്റ്ററോയ്ഡുകൾ. ഇവയെ കുറിച്ചു പഠിക്കാൻ നാസ വിക്ഷേപിച്ച പേടകമാണ് Dawn (പ്രഭാതം). ഇപ്പോൾ അത് ഛിന്നഗ്രഹങ്ങളിൽ രണ്ടാമനായ വെസ്റ്റയെ സമീപിച്ചു കൊണ്ടിരിക്കുകയാണ്. ആദ്യത്തെ ഫോട്ടോ മെയ് 3ന് ഭൂമിയിലെത്തി. 1.21 കി.മീറ്റർ അകലെ നിന്ന് പകർത്തിയ ചിത്രമാണിത്. ഭൂമിയിൽ നിന്ന് 117 മില്യൻ കി.മീറ്റർ അകലെയാണ് വെസ്റ്റ സ്ഥിതി ചെയ്യുന്നത്. ജൂലൈ 16ന് ഡോൺ വെസ്റ്റയുടെ ചുറ്റുമുള്ള അതിന്റെ ഭ്രമണപഥത്തിൽ പ്രവേശിക്കും.

     വെറും 530കി.മീറ്റർ മാത്രം വ്യാസമേയുള്ളു ആസ്റ്ററോയ്ഡ് ബെൽറ്റിലെ രണ്ടാമനായ ഈ ഛിന്നഗ്രഹത്തിന്. സൌരയൂഥ പഠനത്തിൽ ആസ്റ്ററോയ്ഡുകളെ കുറിച്ചുള്ള പഠനത്തിന് വളരെ പ്രാധാന്യമുണ്ട്. ഇത്തരത്തിലുള്ള കൊച്ചു കൊച്ചു ഗ്രഹങ്ങൾ കൂടിച്ചേർന്നാണത്രെ സൌരയൂഥത്തിലെ ഓരോ ഗ്രഹങ്ങളും ഉണ്ടായിട്ടുള്ളത്. അതുകൊണ്ടു തന്നെ ഗ്രഹരൂപീകരണത്തെ കുറിച്ച് കൂടുതൽ കാര്യങ്ങൾ മനസ്സിലാക്കാൻ ഇതിലൂടെ കഴിയുമെന്നാണ് ശാസ്ത്രസമൂഹം കരുതുന്നത്. ഭൌമ-ആകാശ ദൂരദർശിനികൾ വെസ്റ്റയുടെ കുറെയേറെ ചിത്രങ്ങൾ എടുത്തിട്ടുണ്ട്. എങ്കിലും ഇതിന്റെ ഉപരിതലത്തെ കുറിച്ച് വളരെ കുറച്ച് വിവരങ്ങൾ മാത്രമെ നമുക്കറിയാൻ കഴിഞ്ഞിട്ടുള്ളു.

     ആഗസ്റ്റ് മാസത്തിൽ 2700 കി.മീറ്റർ അടുത്തെത്തുകയും കൂടുതൽ വിശദമാ‍യ വിവരങ്ങൾ സംഭരിക്കാൻ തുടങ്ങുകയും ചെയ്യും. പിന്നീടുള്ള മാസങ്ങളിൽ ഡോൺ വെസ്റ്റയുമായി കൂടുതൽ അടുക്കുകയും പ്രതലത്തെ കുറിച്ചു മനസ്സിലാക്കുന്നതിനും ടോപ്പോഗ്രാഫിക് മേപ്പുകൾ തയ്യാറാക്കുന്നതിനും ആവശ്യമായ വിവരങ്ങൾ സംഭരിക്കുകയും ചെയ്യും. ഒരു വർഷമായിരിക്കും ഡോൺ വെസ്റ്റയുമായി കഴിയുക. അതിനു ശേഷം സിറസ് എന്ന ആസ്റ്ററോയ്ഡിനു നേരെ നീങ്ങും. 2015ൽ സിറസിനെ പ്രദക്ഷിണം ചെയ്യാൻ തുടങ്ങും.

     ഈ രണ്ടു ഛിന്നഗ്രഹങ്ങളെയും പഠിക്കുന്നതിലൂടെ സൌരയൂഥത്തിന്റെ ആദ്യകാല ചരിത്രത്തിലേക്ക് വെളിച്ചം വീശുന്ന വിലപ്പെട്ട വിവരങ്ങൾ ലഭ്യമാകും എന്നാണ് ശാസ്ത്രജ്നർ കരുതുന്നത്. പ്രതലത്തിന്റെ രാസഘടന, ടോപ്പോഗ്രാഫി എന്നിവ പഠിക്കുന്നതിനാവശ്യമായ ഉപകരണങ്ങൾ ഡോണിലുണ്ട്. കൂ‍ടാതെ ഇതിന്റെ ഗുരുത്വാകർഷണ ശക്തിയും അളക്കും. അതിലൂടെ ആന്തരിക ഘടനയെ കുറിച്ചുള്ള വിവരങ്ങളും കുറെ മനസ്സിലാക്കാൻ കഴിയും.

     തീർച്ചയായും നമ്മുടെ ചരിത്രം പ്രപഞ്ചത്തോളം പഴക്കമുള്ളതാണ്. അതിന്റെ എല്ലാ കണ്ണികളും നമുക്ക് ഇപ്പോഴും തിരിച്ചെടുക്കാൻ കഴിഞ്ഞിട്ടില്ല. വിട്ടു പോയ ചില കണ്ണികളെയെങ്കിലും കണ്ടെടുക്കാൻ പ്രഭാതസവാരിയിലൂടെ കഴിയുമെന്ന് നമുക്ക് പ്രതീക്ഷിക്കാം.

2011, മേയ് 10, ചൊവ്വാഴ്ച

പുലർകാല ഗ്രഹസംഗമം




          സൂര്യോദയത്തിനു മുമ്പ് എഴുന്നേൽക്കാറുണ്ടോ? ഇല്ലെങ്കിൽ ഒരു ദിവസം അഞ്ചരക്ക് ഉണർന്ന് നിങ്ങളുടെ കിടപ്പുമുറിയുടെ കിഴക്കു ഭാഗത്തുള്ള ജനവാതിൽ തുറന്ന് ആകാശത്തേക്കൊന്നു നോക്കൂ. മൂ‍ന്നു തിളക്കമേറിയ നക്ഷത്രങ്ങളെ കാണാം. യഥാർത്ഥത്തിൽ അവ നക്ഷത്രങ്ങളല്ല- ഗ്രഹങ്ങളാണ്. ബുധൻ, ശുക്രൻ, വ്യാഴം, എന്നിവ.


          ഇന്ന് ശുക്രനും വ്യഴവും വളരെ അടുത്തടുത്ത് ആയിരുന്നു. എന്തോ സ്വകാര്യം പറയുന്ന പോലെ. 6.50 വരെയും ശുക്രനെ കാണാൻ കഴിഞ്ഞു—പുലർകാലവെളിച്ചം പരക്കുന്നതു വരെക്കും!!!


          ഇനിയുള്ള ഓരോ ദിവസവും നിരീക്ഷിക്കുകയാണെങ്കിൽ ഇവയുടെ സ്ഥാനചലനം വളരെ വ്യക്തമായി നിരീക്ഷിക്കാനാവും. അതിനു സഹായിക്കുന്ന ഒരു വീഡിയോ ഇവിടെ കാണാം. മെയ് 13ന് ശുക്രനും വ്യാഴവും ബുധനും ചേർന്ന് ഒരു സമപാർശ്വ ത്രികോണം സൃഷ്ടിക്കുന്നതു കാണാം.  മെയ് 20ന് മറ്റൊരു ത്രികോണം കാണാം. ഇത് സൃഷ്ടിക്കുന്നത്  ചൊവ്വയും ശുക്രനും ബുധനും ചേർന്നായിരിക്കും. ചൊവ്വ കുറെ മങ്ങിയതായിരിക്കും എന്നു മാത്രം. പ്രാതലിനൊപ്പം ഒരു ജ്യാമിതി ക്ലാസ് കൂടിയാവാം അല്ലേ? മെയ് 30ന് ഈ പ്രദർശനം അതിന്റെ ക്ലൈമാക്സിലെത്തും. അന്ന് ചന്ദ്രനും ഒരു കലയായി ഇവരോടൊപ്പം ചേരും. മഴക്കാറില്ലെങ്കിൽ ഓരോ ദിവസവും നമുക്ക് ആസ്വദിക്കാം—ഗ്രഹങ്ങളുടെ സംഘനൃത്തം!


        ഇനിയെന്തു കാരണം വേണം നേരത്തെ ഉണരാൻ?

2011, മേയ് 3, ചൊവ്വാഴ്ച

കണ്ണെത്തും ദൂരത്ത് ഒരു സൌരേതരഗ്രഹം





     എന്നു പറഞ്ഞാൽ അങ്ങനെയൊന്നും കാണാൻ പറ്റില്ല കേട്ടോ. ഈ ഗ്രഹയൂഥത്തിന്റെ മാതൃനക്ഷത്രത്തിനെ ശ്രദ്ധിച്ചു നോക്കിയാൽ കാണാൻ കഴിയും എന്നു മാത്രം. ഇതു വരെ കണ്ടെത്തിയ സൌരേതര ഗ്രഹങ്ങളുടെ മാതൃനക്ഷത്രങ്ങളെയൊന്നും നഗ്നനേത്രങ്ങൾ കൊണ്ടു കാണാൻ പറ്റില്ല. കേരളത്തിലുള്ളവർക്ക് ഈ കാലത്ത് രാത്രി എട്ടു മണി സമയത്ത് തലക്കു മുകളിൽ കാണാൻ കഴിയുന്ന ഒരു നക്ഷത്രഗണമാണ് കർക്കിടകം(cancer).  ഈ ഗണത്തിലെ ഒരു നക്ഷത്രമാണ് 55 Cancri. ഇത് മഞ്ഞും മഴക്കാറും ഒട്ടും പ്രകാശവും ഇല്ലാത്ത സ്ഥലത്തു നിന്നു നോക്കുകയാണെങ്കിൽ നമുക്കും കാണാൻ കഴിയും. ചിത്രത്തിൽ ചുവന്ന വലയത്തിനുള്ളിലെ രണ്ടു നക്ഷത്രങ്ങളിൽ താഴെയുള്ളതാണ് 55 Cancri. ഭൂമിയിൽ നിന്ന് 40 പ്രകാശ വർഷം അകലെയാണ് ഇതിന്റെ സ്ഥാനം. കാന്തിമാനം 6. എന്നു പറഞ്ഞാൽ നമുക്കു ശ്രദ്ധിച്ചു നോക്കിയാൽ കാണാൻ കഴിയുന്ന ഒരു നക്ഷത്രമാണ് എന്നർത്ഥം. ഒരു മഞ്ഞ കുള്ളനും ഒരു ചുവപ്പു കുള്ളനും ചേർന്ന ഒരു ഇരട്ട നക്ഷത്രമാണിത്. ഇവ തമ്മിലുള്ള അകലം 1000 AU ആണ്. അതായത് സൂര്യനും ഭൂമിയും തമ്മിലുള്ള അകലത്തിന്റെ 1000 മടങ്ങ്.

       1997ലാണ് ഈ നക്ഷത്രത്തിന്റെ ആദ്യത്തെ ഗ്രഹത്തെ കണ്ടെത്തിയത്. പിന്നീട് ഇതു വരെയായി അഞ്ച് ഗ്രഹങ്ങളെ കണ്ടെത്തിയിട്ടുണ്ട്. 2004ൽ കണ്ടെത്തിയ നാലാമത്തെ ഗ്രഹമാണ് 55 Cnc e. അന്ന് ഇതിന്റെ പിണ്ഡം ഭൂമിയുടെ പിണ്ഡത്തിന്റെ 14.2 മടങ്ങു വരും എന്നാണ് കണക്കാക്കിയിരുന്നത്. എന്നാൽ ഏറ്റവും ഒടുവിലത്തെ ചില പഠനങ്ങളിൽ ഇത് തിരുത്തപ്പെട്ടിരിക്കുകയാണ്. മസാച്ചുസെറ്റ്സ് ഇൻസ്റ്റിട്യൂട്ട് ഓഫ് ടെക്നോളജിയിലെ ശാസ്ത്രജ്നനായ ജോഷ്വാ വിൻ നടത്തിയ പഠനത്തിൽ പറയുന്നത് ഈ ഗ്രഹത്തിന്റെ പിണ്ഡം ഭൂമിയുടെ പിണ്ഡത്തിന്റെ ഏകദേശം ഒമ്പതു മടങ്ങും ആരം ഏകദേശം 1.7 മടങ്ങും ആയിരിക്കും എന്നാണ്.
     സാന്ദ്രത ഏകദേശം 12g cm-3 ആയിരിക്കുമത്രെ. ഭൂമിയുടെ ആപേക്ഷിക സാ‍ന്ദ്രത 5.515 g cm-3 ആണ്. ഇങ്ങനെയാണെങ്കിൽ ഇതൊരു ശിലാഗ്രഹം ആയിരിക്കുമെന്നാണ് വിചാരിക്കുന്നത്. മാത്രമല്ല അഗ്നിപർവ്വതങ്ങളും കട്ടി കൂടിയ അന്തരീക്ഷവും ഉണ്ടായിരിക്കുമെന്നും ജ്വോഷ്വായും സംഘവും പറയുന്നു.

     ഏതായാലും ഖസാക്കിലെ രവിയുടെ അമ്മ നക്ഷത്രക്കുഞ്ഞുങ്ങളെ കാണിച്ചു കൊടുത്തിരുന്നതു പോലെ നമുക്കും പറഞ്ഞു കൊടുക്കാം അതാ ആ കാണുന്ന നക്ഷത്രത്തിനു ചുറ്റും അഞ്ചു ഗ്രഹങ്ങളുണ്ടെന്നും അതിലൊന്ന് ഭൂമിയെ പോലെ ഉറച്ചതാണെന്നും അതിന് അന്തരീക്ഷമുണ്ടെന്നും........!!!!!!!!!!
    
Get

Blogger Falling Objects