2013, ഡിസംബർ 21, ശനിയാഴ്‌ച

ക്രാബ് നെബുലയിൽ ആർഗോൺ സംയുക്തം.

ഉൽകൃഷ്ട വാതകങ്ങൾ പൊതുവെ രാസപ്രവർത്തനങ്ങളിൽ ഏർപ്പെടുക പതിവില്ല. വളരെ അപൂർവ്വമായി മാത്രം സംഭവിക്കുന്ന കാര്യങ്ങൾ എപ്പോഴും വാർത്തയാണ്.  ബഹിരാകാശത്ത് ആദ്യമായി ആർഗോൺ സംയുക്തത്തെ കണ്ടെത്തിയതാണ് പുതിയ വാർത്ത.
    ക്രാബ് നെബുലയിലാണ് ആർഗോൺ ഹൈഡ്രൈഡ് എന്ന സംയുക്തം കണ്ടെത്തിയിരിക്കുന്നത്. മനുഷ്യൻ ആദ്യമായി തിരിച്ചറിഞ്ഞ നെബുലകളിലൊന്നാണിത്. ഈ നെബുല ഉണ്ടാവാൻ കാരണമായ സൂപ്പർ നോവ 1054ൽ തന്നെ ചൈനയിലെയും അറേബ്യയിലെയും ജ്യോതിശാസ്ത്രജ്ഞർ കണ്ടതായി രേഖപ്പെടുത്തിയിട്ടുണ്ട്. 1731ൽ ജോൺ ബെവിസ് എന്ന ശാസ്ത്രജ്ഞനാണ് ക്രാബ് നെബുലയെ ആദ്യമായി നിരീക്ഷിക്കുന്നത്. ചാൾസ് മെസ്സിയർ അദ്ദേഹത്തിന്റെ പട്ടികയിൽ ഒന്നാമത്തെ ഇനമായി ഇതിനെ ചേർത്തു (M 1). റോസെ പ്രഭുവാണ് ഇതിന് ക്രാബ് നെബുല എന്നു പേരിട്ടത്. അദ്ദേഹം ഇതിന്റെ രേഖാചിത്രം വരച്ചപ്പോൾ അതിനു ഒരു ഞെണ്ടിന്റെ രൂപം തോന്നിയതിനാലാണത്രെ ഈ പേര് നല്കിയത്. ഭൂമിയിൽ നിന്ന് ഏകദേശം 6500 പ്രകാശവർഷം അകലെ കിടക്കുന്ന ക്രാബ് നെബുലയുടെ വ്യാസം ഏതാണ്ട് 11 പ്രകാശവർഷമാണ്. വളരെ ശക്തിയേറിയ വികിരണതരംഗങ്ങൾ പുറപ്പെടുവിക്കുന്ന ഒരു ബഹിരാകാശ വസ്തു കൂടിയാണ് ക്രാബ് നെബുല.
     ഒരു പക്ഷെ ജ്യോതിശാസ്ത്രജ്ഞർ ഏറ്റവും കൂടുതൽ നിരീക്ഷണങ്ങൾക്കു വിധേയമാക്കിയ നെബുലയും ക്രാബ് നെബുല തന്നെയായിരിക്കും. ഇക്കാരണത്താലാകും ആദ്യമായി തിരിച്ചറിഞ്ഞ പൾസാർ ക്രാബ് പൾസാർ ആയത്. ഇപ്പോൾ ആദ്യമായി ഒരു ഉൽകൃഷ്ട മൂലകത്തിന്റെ സാന്നിദ്ധ്യം  പ്രകടമാക്കിക്കൊണ്ട് അത് വീണ്ടും വാർത്തയാകുന്നു. നെബുലയിലെ താരതമ്യേന തണുത്ത ധൂളീപടലങ്ങൾ നിറഞ്ഞ പ്രദേശത്താണ് ആഗോൺ ഹൈഡ്രൈഡിന്റെ സാന്നിദ്ധ്യം കണ്ടെത്തിയിട്ടുള്ളത്.  ലണ്ടൻ യൂണിവേഴ്സിറ്റി കോളെജിലെ പ്രൊഫസർ മൈക്ക് ബാർലോവിന്റെ നേതൃത്വത്തിലുള്ള സംഘമാണ് ഈ കണ്ടെത്തൽ നടത്തിയിരിക്കുന്നത്. ആർഗോണിന്റെ തന്മാത്രാ രൂപത്തിലോ സംയുക്ത രൂപത്തിലോ ബഹിരാകാശത്ത് കണ്ടെത്തുന്നത് ആദ്യമായാണെന്ന് അദ്ദേഹം പറഞ്ഞു. കഴിഞ്ഞ ഏപ്രിൽ മാസത്തിൽ ദൗത്യം അവസാനിപ്പിച്ച ഹെർഷൽ ബഹിരാകാശ ദൂരദർശിനിയിൽ നിന്നും ലഭിച്ച വിവരങ്ങൾ വിശകലനം ചെയ്താണ് അവർ ഈ നിഗമനത്തിൽ എത്തിയത്.

    താപനില കൂടിയ തിളക്കമേറിയ ബഹിരാകാശ പദാർത്ഥങ്ങളെ കുറിച്ചു പഠിക്കാൻ ദൃശ്യപ്രകാശം തന്നെ ഉപയോഗിക്കാമെങ്കിലും താരതമ്യേന ഇരുണ്ട ധൂളീപടലങ്ങൾ നിറഞ്ഞ പ്രദേശങ്ങളെ കുറിച്ചു പഠിക്കാൻ ഇൻഫ്രാറെഡ് വികിരണങ്ങളാണ് ഉപയോഗിക്കാറുള്ളത്. ഇൻഫ്രാറെഡ് കിരണങ്ങൾ ഉപയോഗിച്ച് പ്രപഞ്ചത്തെ പഠിക്കുക എന്നതായിരുന്നു ഹെർഷൽ ബഹിരാകാശ ദൂരദർശിനിയുടെ ദൗത്യം. 2009 മെയ് 14ന് ആകാശത്തെത്തിയ ഹെർഷൽ 2013 ഏപ്രിൽ 29 വരെയുള്ള കാലയളവിൽ 35000ലേറെ നിരീക്ഷണങ്ങളാണ്  നടത്തിയിട്ടുള്ളത്. നെബുലകളുടെ ഉൾഭാഗങ്ങളെയും ധൂളീപടലങ്ങൾ നിറഞ്ഞ ഇരുണ്ട ഭാഗങ്ങളെയും കുറിച്ചുള്ള നിരവധി വിവരങ്ങളാണ് ഇതിലൂടെ നമുക്കു ലഭിച്ചത്.
     ബഹിരാകാശ പദാർത്ഥങ്ങളിൽ നിന്നും പുറത്തു വരുന്ന വിദ്യുത് കാന്തിക
തരംഗങ്ങളുടെ വർണ്ണരാജി വിശകലനം ചെയ്താണ് അവയിലടങ്ങിയിരിക്കുന്ന പദാർത്ഥങ്ങളെ കുറിച്ചു മനസ്സിലാക്കുന്നത്. ക്രാബ് നെബുലയുടെ ചില പ്രത്യേക ഭാഗങ്ങളിൽ നിന്നും വളരെയേറെ ശക്തികൂടിയ വികിരണങ്ങളെ വിശകലനം ചെയ്തതിൽ നിന്നാണ് അവിടെ തന്മാത്രാരൂപത്തിലുള്ള ആർഗോൺ ഹൈഡ്രൈഡ് അയോണുള്ളകൾ ഉള്ളതായി തെളിഞ്ഞത്. നെബുലയുടെ കേന്ദ്രത്തിലെ ന്യൂട്രോൺ നക്ഷത്രത്തിൽ നിന്നു വരുന്ന ശക്തിയേറിയ ഊർജ്ജകണങ്ങൾ ആർഗോൺ ആറ്റങ്ങളെ അയണീകരിക്കുകയും ഇവ പിന്നീട് ഹൈഡ്രജൻ തന്മാത്രകളുമായി ചേർന്ന്  ആർഗോൺ ഹൈഡ്രൈഡ് അയോണുകളായി (ArH+) മാറുകയുമാണ് ചെയ്യുന്നത്.
     പ്രകൃതിയിൽ ആർഗോൺ എങ്ങനെ രൂപംകൊണ്ടു എന്നതിനെ കുറിച്ചുള്ള പഠനങ്ങൾക്ക് ഈ പുതിയ കണ്ടെത്തൽ സഹായകരമാവുമെന്നാണ് കരുതപ്പെടുന്നത്.
     
കടപ്പാട്: അസ്ട്രോണമി മാഗസിൻ, വിക്കിപ്പീഡിയ

2013, ഡിസംബർ 14, ശനിയാഴ്‌ച

ടൈറ്റനിൽ ജീവനുണ്ടാകുമോ?

ശനിയുടെ ഉപഗ്രഹമായ ടൈറ്റൻ നമ്മുടെ ശാസ്ത്രജ്ഞർക്ക് പ്രിയപ്പെട്ട ഒരു സൗരയൂഥ സ്ഥാനമാണ്. ഭൂമിയെ പോലെ ദ്രവരൂപത്തിലുള്ള ജലം ഉപരിതലത്തിൽ കാണപ്പെടുന്ന മറ്റൊരു ഗോളമാണ് ടൈറ്റൻ. ഇതുകൊണ്ടുതന്നെ ഇതിനെ പറ്റി നിരവധി പഠനങ്ങൾ സൗരയൂഥ ഗവേഷകർ നടത്തിക്കൊണ്ടിരിക്കുന്നു. അതിൽ അവസാനത്തേതാണ് കാസ്സിനി ബഹിരാകാശ പേടകം നൽകിയ വിവരങ്ങൾ വിശകലനം ചെയ്തതിൽ നിന്നും കിട്ടിയിരിക്കുന്നത്. ഇത് പുതിയ ചില സാദ്ധ്യതകളാണ് നമുക്കു മുന്നിൽ തുറന്നിട്ടിരിക്കുന്നത്.
     ടൈറ്റനിൽ ഏകകോശജീവികൾ ഉണ്ടായിരിക്കാനുള്ള സാദ്ധ്യത പല ശാസ്ത്രജ്ഞരും തള്ളിക്കളയുന്നില്ല. ഇതിനു കൂടുതൽ ബലം നൽകുന്ന തെളിവാണ് പുതിയതായി ലഭിച്ചിരിക്കുന്നത്. കാസ്സിനി ടൈറ്റന്റെ ഏറ്റവും സമീപത്തു കൂടി കടന്നു പോയപ്പോള്‍ എടുത്ത ചിത്രങ്ങൾ പരിശോധിച്ചതിൽ നിന്ന് ഇതിന്റെ ഉത്തരധ്രുവത്തിലുള്ള തടാകങ്ങളിലും സമുദ്രങ്ങളിലും ധാരാളം ഹൈഡ്രോകാർബണുകൾ അടങ്ങിയിരിക്കുന്നു എന്നു കണ്ടെത്തി. മുമ്പു നടത്തിയ പറക്കലുകളിൽ നിന്നും വ്യത്യസ്തമായ സ്ഥാനങ്ങളിലൂടെയായിരുന്നു ഇപ്രാവശ്യം കാസ്സിനി പറന്നത്. ഇത് മറ്റൊരു ആംഗിളിൽ നിന്ന് ഈ പ്രദേശങ്ങളെ നിരീക്ഷിക്കാൻ സഹായിച്ചു. ടൈറ്റനിലെ ഏറ്റവും വലിയ കടലുകളായ ക്രാക്കൻ മരെ, ലിജിയാ മരെ എന്നീ കടലുകളും അടുത്തുള്ള മറ്റു ചില തടാകങ്ങളുമാണ് ഇങ്ങനെ നിരീക്ഷിച്ചത്. ഇതിൽ നിന്നുമാണ് ഇതുവരെ കിട്ടാതിരുന്ന പല വിശദാംശങ്ങളും ലഭ്യമായത്.
     ടൈറ്റൻ പഠനത്തിൽ ഇതുവരെ ഉപയോഗിച്ചിട്ടില്ലാത്ത പുതിയ സാങ്കേതിക വിദ്യ ഉപയോഗപ്പെടുത്തി ലിജിയാ മരെ എന്ന സമുദ്രത്തിന്റെ ആഴം 170മീറ്ററാണ് എന്നും കണ്ടെത്തി. ആദ്യമായാണ് ടൈറ്റനിലെ ഒരു സമുദ്രത്തിന്റെ ആഴം കണ്ടെത്തുന്നത്. ടൈറ്റന്റെ ഉത്തരാർദ്ധഗോളത്തിലാണ് ഏറ്റവും കൂടുതൽ ജലശേഖരമുള്ളത്. 
     ഏതാണ്ട് 9000 ക്യുബിക് കിലോമീറ്റർ ദ്രവഹൈഡ്രോകാർബൺ ഇവിടെയുണ്ടെന്നാണ് കണക്കാക്കിയിട്ടുള്ളത്. ഇത് ഭൂമിയിലെ മൊത്തം എണ്ണനിക്ഷേപത്തിന്റെ 40 മടങ്ങിൽ കൂടുതൽ വരും.

കടപ്പാട്:നാസ

2013, ഒക്‌ടോബർ 4, വെള്ളിയാഴ്‌ച

ഒക്ടോബറിലെ ആകാശവിശേഷങ്ങൾ

ഈ മാസം 15൹ മദ്ധ്യകേരളത്തിൽ രാത്രി എട്ടുമണിക്ക് കാണുന്ന ആകാശം

ചരിത്രത്തിൽ
3- 1942 :
ജർമ്മനി ആദ്യമായി ബഹിരാകാശത്തേക്ക് റോക്കറ്റ് വിക്ഷേപിച്ചു.
4- 1957 :
സ്ഫുട്നിക് വിക്ഷേപിച്ചു.
10- 1967 :
അന്താരാഷ്ട്ര ശൂന്യാകാശ ഉടമ്പടി നിലവിൽ വന്നു.
11- 1958 :
പയനീർ-1 വിക്ഷേപിച്ചു.
11- 1984 :
കാതറിൻ ഡി. സള്ളിവൻ ബഹിരാകാശത്തു നടക്കുന്ന ആദ്യവനിതയായി.
13- 1973 :
വേൾപൂൾ ഗാലക്സി കണ്ടെത്തി.
22- 2008 :
ചന്ദ്രയാൻ-1 വിക്ഷേപിച്ചു.
സംഭവങ്ങൾ
1
ചന്ദ്രനെയും ചൊവ്വയേയും അടുത്തു കാണാം
2
ശുക്രൻ വൃശ്ചികം രാശിയിലേക്ക് പ്രവേശിക്കുന്നു 
          5
അമാവാസി
ചൊവ്വ ചിങ്ങം രാശിയിലേക്ക് പ്രവേശിക്കുന്നു
7
ബുധൻ, ശനി, ചന്ദ്രൻ എന്നിവ അടുത്തു വരുന്നു
8
ചന്ദ്രനെയും ശുക്രനെയും അടുത്തു കാണാം
16
ചൊവ്വ റിഗല്യസിന്റെ അടുത്ത്
17
ശുക്രനും അന്റാറിസും അടുത്തു വരുന്നു
സൂര്യൻ തുലാം രാശിയിലേക്ക് പ്രവേശിക്കുന്നു 
18
പൗർണ്ണമി
21,22
ഒറിയോണിഡ് ഉൽക്കാവർഷം
26
വ്യാഴവും ചന്ദ്രനും അടുത്തു വരുന്നു
30 
ശുക്രൻ ധനു രാശിയിലേക്ക് പ്രവേശിക്കുന്നു
(കടപ്പാട്: വിക്കിപ്പീഡിയ)
ഗ്രഹക്കാഴ്ച
 ബുധൻ
 കാണാൻ കഴിയില്ല. രാവിലെ 7.53ന് ഉദിച്ച് സന്ധ്യക്ക് 7.25ന് അസ്തമിക്കും.
ശുക്രൻ
സൂര്യാസ്തമയത്തിനു ശേഷം വൃശ്ചികം രാശിയിൽ കാണാം. രാവിലെ 9.32ന് ഉദിക്കും. രാത്രി 8.56ന് അസ്തമിക്കും. കാന്തിമാനം -4.
ചൊവ്വ
സൂര്യോദയത്തിനു മുമ്പ് ചിങ്ങം രാശിയിൽ. രാവിലെ 2.46ന് ഉദിക്കും. ഉച്ചതിരിഞ്ഞ് 3.10ന് അസ്തമിക്കും. കാന്തിമാനം 2
വ്യാഴം
 അർദ്ധരാത്രി മുതൽ മിഥുനം രാശിയിൽ കാണാം. രാത്രി 11.53ന് ഉദയം ഉച്ചക്ക് 12.31ന് അസ്തമയം. കാന്തിമാനം -2
ശനി
സൂര്യാസ്തമയത്തിനു ശേഷം അല്പനേരം തുലാം രാശിയിൽ കാണാം. ഉദയം രാവിലെ 7.34ന്. അസ്തമയം രാത്രി 7.16ന്.
(സമയങ്ങൾ ഒക്ടോബർ 15നെ അടിസ്ഥാനപ്പെടുത്തിയുള്ളത്.) 

ഐസോൺ വിശേഷങ്ങൾ
ഒരു ഇടത്തരം ദൂരദർശിനിയുണ്ടെങ്കിൽ ഐസോണിനെ ചൊവ്വയുടെ സമീപത്തായി കണ്ടെത്താം. കാന്തിമാനം 11. മാസാരംഭത്തിൽ പ്രഭാതത്തിൽ ചൊവ്വയുടെ സമീപത്തുനിന്ന് 2ഡിഗ്രി വടക്കുഭാഗത്തായി ഇതിനെ കാണാം. പതിനഞ്ചാം തിയ്യതി ആകുമ്പോഴേക്കും ഇവതമ്മിലുള്ള അകലം ഒരു ഡിഗ്രിയായി ചുരുങ്ങും. യഥാർത്ഥത്തിൽ ഒക്ടോബർ ഒന്നിനാണ് ഐസോൺ ചൊവ്വയുടെ ഏറ്റവും അടുത്തു കൂടി കടന്നുപോകുക. അപ്പോൾ ഇവതമ്മിലുള്ള അകലം 10.8 മില്യൻ കി.മീറ്റർ ആയിരിക്കും.
സെപ്റ്റംബർ 29൹ മാർസ് റെക്കനൈസൻസ് ഓർബിറ്റർ എടുത്ത ഐസോൺ ചിത്രങ്ങൾ
 
   

2013, സെപ്റ്റംബർ 1, ഞായറാഴ്‌ച

സെപ്റ്റംബറിലെ ആകാശവിശേഷങ്ങൾ

2013 സെപ്റ്റംബര്‍ മാസം 15൹ രാത്രി 8മണിയ്ക്ക് മദ്ധ്യകേരളത്തില്‍ കാണാന്‍ കഴിയുന്ന നക്ഷത്രങ്ങളുടെ ചാര്‍ട്ട്. കടപ്പാട്: വിക്കിപ്പീഡിയ
സെപ്റ്റംബർ-1:
വ്യാഴവും ചന്ദ്രനും അടുത്തു വരുന്നു.
സെപ്റ്റംബർ-2:
ചന്ദ്രനും ചൊവ്വയും അടുത്തു വരുന്നു.
സെപ്റ്റംബർ-5:
അമാവാസി. ബുധൻ കന്നി രാശിയിലേയ്ക്കു പ്രവേശിക്കുന്നു.
സെപ്റ്റംബർ-6:
ശുക്രനേയും ചിത്ര നക്ഷത്രത്തേയും അടുത്തടുത്തു കണാം. ശുക്രൻ തുലാം രാശിയിലേക്കു പ്രവേശിക്കുന്നു.
സെപ്റ്റംബർ-8:
ചന്ദ്രനും ശുക്രനും അടുത്തു വരുന്നു.
സെപ്റ്റംബർ-18: പൗർണ്ണമി. 
സെപ്റ്റംബർ-25: 25൹ ബുധൻ തുലാം രാശിയിലേക്കു പ്രവേശിക്കുന്നു.
ശുക്രൻ:
 ശുക്രൻ സാന്ധ്യതാരകമായി
തിരിച്ചു വരുന്നു.
സൂര്യാസ്തമയത്തിനു ശേഷം പടിഞ്ഞാറൻ
ചക്രവാളത്തിൽ ശുക്രനെ കാണാം.
8൹ ചന്ദ്രന്റെ സമീപത്തായി ശുക്രനെ
കാണാം.
വ്യാഴം:
  വ്യാഴത്തെ ഈ മാസം പ്രഭാതത്തിൽ കാണാം.
മിഥുനം രാശിയിലാണ് വ്യാഴത്തിന്റെ സ്ഥാനം.
ചൊവ്വ:
ചൊവ്വയേയും പ്രഭാതത്തിൽ കർക്കിടകം
രാശിയിൽ കണാം.
ബുധൻ:
ഈ മാസം കാണാൻ കഴിയില്ല. 
ഐസോൺ വിശേഷങ്ങ
നല്ലൊരു ദൂരദർശിനിയുണ്ടെങ്കിൽ ഐസോണിനെ ചൊവ്വയുടെ അടുത്തു കണ്ടെത്താം. കർക്കിടകം രാശിയുടെ കേന്ദ്രഭാഗത്തു നിന്നും അൽപം മാറി ബീഹിവ് താരവ്യൂഹത്തിനു സമീപത്തായി സെപ്റ്റംബർ 5൹ ഐസോണിനെ കാണാം.ഈ മാസം മുഴുവൻ ഇത് ചൊവ്വയുടെ സമീപത്തു തന്നെയായിരിക്കും. പക്ഷെ നല്ലൊരു കാഴ്ചക്കായി ഇനിയും നമ്മൾ കാത്തിരിക്കുക തന്നെ വേണം.






2013, ഓഗസ്റ്റ് 20, ചൊവ്വാഴ്ച

ബുധനിലെ ത്യാഗരാജസാന്നിദ്ധ്യം


"സ്നേഹമില്ലാത്തിടത്ത് അറിവ് വിളയില്ല"(അനുരാഗമുലേന മനസുന സുജ്ഞാനമുരാദ) എന്നു പാടി നടന്ന അനശ്വരഗായകൻ ത്യാഗരാജസ്വാമികളുടെ പേരിലുള്ള ഒരു ഗർത്തമുണ്ട് ബുധനിൽ. 97കി.മീറ്റർ വ്യാസമുള്ള ത്യാഗരാജഗർത്തത്തിന്റെ ചിത്രമാണ് മുകളിൽ കൊടുത്തിരിക്കുന്നത്. സൂര്യന്റെ ഏറ്റവും അടുത്തു സ്ഥിതിചെയ്യുന്ന ഏറ്റവും ചെറിയ ഗ്രഹമായ ബുധനെ ഭ്രമണം ചെയ്യുന്ന മെസ്സഞ്ചർ ഭൂമിയിലേക്കയച്ച ഏറ്റവും പുതിയ ചിത്രങ്ങളിലുള്ളതാണ് ഈ ചിത്രവും.
   ഗർത്തത്തിനു നടുവിലെ കൊടുമുടിയും തിട്ടുകളും മണ്ണൊലിപ്പിന്റെ പാടുകളും എല്ലാം ഈ ചിത്രത്തിൽ വ്യക്തമായി കാണാം. 200മീറ്റർ/പിക്സൽ നിരക്കിൽ കൃത്യതയുള്ള ഈ ചിത്രം വരും ദിവസങ്ങളിൽ കൂടുതൽ വിശകലനത്തിനു വിധേയമാക്കുമ്പോൾ ബുധനെ കുറിച്ചുള്ള കൂടുതൽ വിവരങ്ങൾ ലഭ്യമാകും എന്നു പ്രതീക്ഷിക്കാം.
   രാജാധികാരം വെച്ചു നീട്ടിയ പ്രലോഭനങ്ങളെ തിരസ്കരിച്ച് തെരുവിലേക്കിറങ്ങി തന്റെ പാണ്ഡിത്യം കൊണ്ട് സാമ്പത്തികദാരിദ്ര്യത്തെ വെല്ലുവിളിച്ച മഹാനായിരുന്നു ത്യാഗരാജസ്വാമികൾ. പ്രപഞ്ചസംഗീതത്തിൽ അലിഞ്ഞു ചേർന്ന ആ നാമം(ദം) അറിവുകൊണ്ട് അധികാരത്തെ വെല്ലുവിളിക്കാനിറങ്ങുന്നവർക്കെല്ലാം എന്നും ഒരു പ്രചോദനമായിരിക്കട്ടെ.

അനുബന്ധപോസ്റ്റുകൾ:
1. ബുധനെ കുറിച്ച് പുതിയ വിവരങ്ങൾ
2. ബുധനിൽ ഗുഹകൾ കണ്ടെത്തി
3. ബുധൻ ചിരിക്കുന്നു
4. മെസ്സഞ്ചറിൽ നിന്നുള്ള ആദ്യചിത്രം
5. സന്ദേശവാഹകൻ ബുധനെ സമീപിക്കുന്നു

2013, ഓഗസ്റ്റ് 6, ചൊവ്വാഴ്ച

ക്യൂരിയോസിറ്റിയുടെ ഒരു വർഷം

ക്യൂരിയോസിറ്റി എടുത്ത 7 ഇമേജുകൾ ഉപയോഗിച്ച് സൃഷ്ടിച്ച ചൊവ്വയുടെ പ്രതലത്തിന്റെ ചിത്രം. കടപ്പാട്: നാസ
ചൊവ്വയിലെ ജീവനന്വേഷിച്ച് ക്യൂരിയോസിറ്റി അവിടെയെത്തിയിട്ട് ഒരു വർഷമായി. കഴിഞ്ഞ വർഷം ആഗസ്റ്റ് 6നാണ് ക്യൂരിയോസിറ്റി ചൊവ്വയിലിറങ്ങിയത്. ചൊവ്വയിലെ ജീവസാന്നിദ്ധ്യം അറിയുക എന്നതായിരുന്നു ഇതിന്റെ പ്രധാന ദൗത്യം. ഈ ഒരു വർഷത്തിനിടയിൽ നിരവധി വിവരങ്ങളാണ് ഇത് ഭൂമിയിലേക്കയച്ചു തന്നത്.
      190 ഗീഗാബൈറ്റ് വിവരങ്ങളാണ് ഇക്കാലയളവിൽ ക്യൂരിയോസിറ്റി ഭൂമിയിലെത്തിച്ചത്. അവിടത്തെ പാറ തുരന്ന് പരിശോധിച്ച് അവയുടെ ഘടനയും ഭൂതകാലത്ത് ഏകകോശജീവികൾ ചൊവ്വയിലുണ്ടായിരുന്നതിന്റെ തെളിവുകളും നമുക്ക് പകർന്നു നൽകി. ഒരു വർഷക്കാലയളവിൽ ഒന്നര കിലോമീറ്ററിലധികമാണ് കാറിന്റെ വലിപ്പമുള്ള ഈ റോവർ ചൊവ്വയിൽ സഞ്ചരിച്ചത്. 
     ചൊവ്വയടെ അന്തരീക്ഷത്തെ കുറിച്ചും അവിടെത്തെ റേഡിയേഷനെയും കാലാവസ്ഥയേയും കുറിച്ചും നിരവധി വിവരങ്ങൾ ഈ കാലയളവിൽ നമുക്കു ലഭിച്ചു കഴിഞ്ഞു. ഇത് ഭാവിയിൽ നടത്താനിരിക്കുന്ന ചൊവ്വയിലേക്കുള്ള മനുഷ്യന്റെ യാത്രയുടെ ആസൂത്രണത്തിൽ സഹായകമാവുമെന്ന് ശാസ്ത്രജ്ഞർ പറയുന്നു. 

                       
അനുബന്ധപോസ്റ്റുകൾ

2013, ജൂലൈ 31, ബുധനാഴ്‌ച

ആഗസ്റ്റിലെ ആകാശം

2013 ആഗസ്റ്റ് മാസത്തിൽ മദ്ധ്യകേരളത്തിൽ രാത്രി 8മണിക്ക് കാണാൻ കഴിയുന്ന ആകാശം.

* ഈ മാസത്തിന്റെ ആദ്യപകുതിയിൽ സൂര്യാസ്തമനത്തിനു ശേഷം ശുക്രനെ ചിങ്ങം രാശിയിൽ കാണാം. 11൹ കന്നി രാശിയിലേക്ക് പ്രവേശിക്കും.
* ശനിയെ ഈ മാസം മുഴുവൻ കന്നി രാശിയിൽ തന്നെ കാണാം. 
* വ്യാഴത്തെയും ചൊവ്വയെയും മാസാവസാനം സൂര്യോദയത്തിനു മുമ്പ് മിഥുനം രാശിയിൽ കണാം. 
* 10൹ സൂര്യാസ്തമനത്തിനു ശേഷം കുറച്ചു സമയം പടിഞ്ഞാറൻ ചക്രവാളത്തിൽ ചന്ദ്രനെയും ശുക്രനെയും അടുത്തു കാണാം.
* 13൹ ചന്ദ്രൻ ശനിയുടെ സമീപത്തെത്തും
ഈ മാസത്തെ മറ്റൊരു മനോഹരമായ കാഴ്ച വൃശ്ചികം രാശിയാണ്. രാത്രി എട്ടു മണിക്ക് തലക്കു മുകളിൽ അൽപം തെക്കുമാറി തേളിന്റെ ആകൃതിയിൽ കിടക്കുന്ന ഈ രാശിയെ പെട്ടെന്നു തന്നെ തിരിച്ചറിയാം. നല്ല വണ്ണം തെളിഞ്ഞ ആകാശമാണെങ്കിൽ ഇതിന്റെ വാലിലൂടെ വടക്കോട്ടു നീണ്ടു കിടക്കുന്ന മേഘശകലങ്ങൾ പോലെ ആകാശഗംഗയും കാണാം.
    'മഴപെയ്തു മാനം തെളിഞ്ഞ നേരം' രാത്രിയിലെപ്പോഴെങ്കിലും കിട്ടുകയാണെങ്കിൽ  ഇവയെല്ലാം ഒന്നു കണ്ടുനോക്കാം.

2013, ജൂലൈ 25, വ്യാഴാഴ്‌ച

സെന്റോറുകളിൽ ഭൂരിഭാഗവും വാൽനക്ഷത്രങ്ങളെ പോലെയെന്ന്

 ഗ്രീക്ക് ഇതിഹാസത്തിലെ മനുഷ്യന്റെയും കുതിരയുടെയും രൂപത്തോടു കൂടിയ കഥാപാത്രമാണ് സെന്റോർ. ഇതുപോലെ സൗരയൂഥത്തിലെ ഇരട്ടസ്വഭാവം കാണിക്കുന്ന പദാർത്ഥങ്ങളാണ് സെന്റോറുകൾ. ബാഹ്യസൗരയൂഥത്തിൽ- പ്രധാനമായും വ്യാത്തിനും നെപ്റ്റ്യൂണിനും ഇടയിൽ- കാണപ്പെടുന്ന വസ്തുക്കളാണ് സെന്റോറുകൾ. ഇവ ഛിന്നഗ്രഹങ്ങളുടെയും വാൽനക്ഷത്രങ്ങളുടെയും സ്വഭാവസവിശേഷതകൾ വഹിക്കുന്നു എന്നായിരുന്നു ഇതുവരെയുള്ള ധാരണ. എന്നാൽ മൂന്നിലൊന്ന് സെന്റോറുകളെങ്കിലും വാൽനക്ഷത്രങ്ങളുടെ സവിശേഷതകൾ ഉള്ളവയാണ് എന്ന് ഏറ്റവും പുതിയ പഠനം വെളിപ്പെടുത്തുന്നു.
      നാസയുടെ വൈസ്‌ (WISE-Wide-field Infrared Survey Explorer) എന്ന ബഹിരാകാശ പേടകത്തിലെ ഛിന്നഗ്രഹങ്ങളെ കുറിച്ചു പഠിക്കുന്നതിനുള്ള ഭാഗമായ നിയോവൈസ് ആണ് ഇവയെ കുറിച്ച് പുതിയ വിവരങ്ങൾ പുറത്തു വിട്ടിട്ടുള്ളത്. 
     സെന്റോറുകളിൽ ഭൂരിഭാഗവും വാൽനക്ഷത്രങ്ങളുടെ സവിശേഷതകൾ പ്രകടിപ്പിക്കുന്നവയാണ് എന്നാണ് പുതിയ പഠനം കാണിക്കുന്നത്. സ്ഥിരമായ ഒരു ഭ്രമണപഥത്തിലൂടെയല്ല ഇവ സൂര്യനെ ചുറ്റിക്കൊണ്ടിരിക്കുന്നത്. പിണ്ഡം കൂടിയ ഗ്രഹങ്ങളുടെ സ്വാധീനമാകാം ഇവയുടെ ഈ ചാഞ്ചാത്തിനുള്ള കാരണമെന്നാണ് കരുതപ്പെടുന്നത്.  സെന്റോറുകളുടെയും ഇവയിൽ നിന്നും വളരെ അകലെ കിടക്കുന്ന ശിഥിലമണ്ഡല പദാർത്ഥങ്ങളുടെയും 52  ഇൻഫ്രാറെഡ് ഇമേജുകളാണ് വൈസ് എടുത്തത്. ഇവയിൽ 15 എണ്ണം പുതിയ കണ്ടെത്തലുകളായിരുന്നു.
     സെന്റോറുകൾക്കു ചുറ്റുമുള്ള പൊടിപടലങ്ങളുടെ വലയം മുന്നേ തന്നെ ബഹിരാകാശശാസ്ത്രജ്ഞരുടെ ശ്രദ്ധയിൽ പെട്ടിരുന്നു. പുതിയ ഇൻഫ്രാറെഡ് ഇമേജുകളിൽ നിന്ന് ഇവയുടെ അൽബിഡോയെ കുറിച്ച് -പ്രകാശത്തെ പ്രതിഫലിപ്പിക്കാനുള്ള ശേഷി- കൂടുതൽ വിവരങ്ങൾ ലഭ്യമായിട്ടുണ്ട്.  ഇത് ഇവയുടെ ഘടനയെ കുറിച്ച് കൂടുതൽ വിവരങ്ങൾ ലഭ്യമാക്കുന്നതിന് സഹായിക്കും.
     1920ലാണ് ആദ്യത്തെ സെന്റോറിനെ (944 ഹിഡാല്‍ഗോ) കണ്ടെത്തുന്നത്.   എന്നാൽ 1977നു ശേഷമാണ് ഇവയെ ധാരാളമായി കണ്ടെത്താൻ തുടങ്ങുന്നത്. ഇന്ന് ഒരു കി.മീറ്ററിൽ കൂടുതൽ വ്യാസമുള്ള സെന്റോറുകളുടെ എണ്ണം 44,000ൽ കൂടുതൽ വരും. എന്നാൽ ഇവയെ കുറിച്ച് കൂടുതൽ വിവരങ്ങളൊന്നും നമുക്ക് അറിയില്ല എന്നതാണ് വസ്തുത. 260കി.മീറ്ററിൽ കൂടുതൽ വ്യാസമുള്ള 10199 ക്ലാരികോ ആണ് ഏറ്റവും വലുത്.
     ഈ മഹാപ്രപഞ്ചത്തിലെ ഇത്തിരിവട്ടമായ സൗരയൂഥത്തിൽ പോലും നമ്മുടെ അറിവിനെ വെല്ലുവിളിക്കുന്ന എത്രയോ മഹാത്ഭുതങ്ങൾ നമ്മെ കാത്തിരിക്കുന്നു! 

2013, ജൂലൈ 23, ചൊവ്വാഴ്ച

നൂറ്റാണ്ടിന്റെ വാൽനക്ഷത്രം കാർബൺ ഡയോക്സൈഡ് ധാരാളമായി പുറംതള്ളുന്നു

കടപ്പാട്: നാസ


നാസയുടെ സ്പിറ്റ്സർ ബഹിരാകാശ ദൂരദർശിനി സൂര്യനോടടുത്തുകൊണ്ടിരിക്കുന്ന ഐസോൺ എന്ന വാൽനക്ഷത്രത്തിൽ നിന്ന് ധാരാളമായി കാർബൺ ഡയോക്സൈഡും പൊടിപടലങ്ങളും പുറംതള്ളുന്നതായി കണ്ടെത്തിയിരിക്കുന്നു. ജൂൺ 13൹ സ്പിറ്റ്സറിന്റെ ഇൻഫ്രാ റെഡ് അറെ കാമറ പിടിച്ചെടുത്ത ചിത്രങ്ങൾ വിശകലനം ചെയ്തപ്പോഴാണ് ഇതു കണ്ടെത്തിയത്. ഇങ്ങനെ പുറംതള്ളുന്ന പൊടിപടലങ്ങൾ സൃഷ്ടിക്കുന്ന വാലിന്റെ ഇപ്പോഴത്തെ നീളം ഏകദേശം 2,99,981.72 കി.മീറ്റർ വരുമത്രെ!
     നാസയുടെ കോമറ്റ് ഐസോൺ ഒബ്സർവേഷൻ കാമ്പയിൻ എന്ന പദ്ധതിക്ക് നേതൃത്വം കൊടുക്കുന്ന കാരി ലിസ്സെ ആണ് ഈ കാര്യങ്ങൾ വെളിപ്പെടുത്തിയത്.
      ഐസോൺ പുറംതള്ളുന്ന വാതകങ്ങളിൽ പ്രധാനമായും അടങ്ങിയിരിക്കുന്നത് കാർബൺ ഡൈയോക്സൈഡ് ആണ്. 9,97,903.214കി.ഗ്രാം വാതകങ്ങളും 5,44,31,084.4 കി.ഗ്രാം പൊടിപടലങ്ങളുമാണത്രെ ഓരോ ദിവസവും ഈ വാൽനക്ഷത്രം പുറംതള്ളിക്കൊണ്ടിരിക്കുന്നത്. സ്പിറ്റ്സർ ഈ നിരീക്ഷണം നടത്തുന്ന സമയത്ത്  ഐസോൺ സൂര്യനിൽ നിന്ന് 50,21,15,328 കി.മീറ്റർ അകലെയായിരുന്നു.
     ഈ നൂറ്റാണ്ടിലെ വാൽനക്ഷത്രം എന്നറിയപ്പെടുന്ന ഐസോണിന്റെ വ്യാസം ഏതാണ്ട് അഞ്ചു കി.മീറ്ററോളം വരുമെന്നാണ് കണക്കാക്കിയിട്ടുള്ളത്. ഏതാണ്ട് ഒരു ചെറിയ പർവ്വതത്തോളം! 350 കോടി കി.ഗ്രാമിലേറെ ഭാരവും കാണുമത്രെ!
     2012 സെപ്റ്റംബർ 21നാണ് സി/2012 എസ്1 എന്ന് ഔദ്യോഗിക നാമം നൽകപ്പെട്ട ഐസോൺ കണ്ടെത്തുന്നത്. റഷ്യയിലെ ഇന്റർനാഷണൽ സയന്റിഫിക് ഓപ്റ്റിക്കൽ നെറ്റ്‌വർക്ക്(ISON) എന്ന സ്ഥാപനത്തിലെ ശാസ്ത്രജ്ഞരായ വിറ്റാലി നെവ്സ്കിയും ആർടിയോൺ നോവിചോനോക്കും ചേർന്നാണ് ഇത് കണ്ടെത്തിയത്. അപ്പോൾ ഇതിന്റെ സ്ഥാനം വ്യാഴത്തിനും ശനിക്കും ഇടയിലായിരുന്നു. സൂര്യനിൽ നിന്ന് ഒരു പ്രകാശം വർഷം അകലെ കിടക്കുന്ന ഊർട്ട് മേഘത്തിൽ നിന്നും വരുന്നതാണ് ഇത് എന്ന് കരുതപ്പെടുന്നു. ഇത്രയും അകലെ നിന്ന് വളരെ അപൂർവ്വമായി മാത്രമേ വാൽനക്ഷത്രങ്ങൾ സൂര്യസമീപത്തെത്താറുള്ളു.
     ആഗസ്റ്റു മാസത്തോടു കൂടി ചെറിയ ദൂരദർശിനികഉപയോഗിച്ചു തന്നെ ഐസോണിനെ നിരീക്ഷിക്കാനാവും.  ക്റ്റോബർ അവസാനത്തോടു കൂടി നഗ്നനേത്രങ്ങൾ കൊണ്ടു തന്നെ ഇതിനെ കാണാൻ കഴിയും. നവംബർ 28൹ സൂര്യന്റെ ഏറ്റവും അടുത്തെത്തുമ്പോൾ  തകർന്നു പോയില്ലെങ്കിൽ ചന്ദ്രനോളം വലിപ്പത്തിൽ കാണാൻ കഴിയുമത്രെ!!!
 

2013, ജൂലൈ 11, വ്യാഴാഴ്‌ച

സൗരയൂഥത്തിനും വാലോ?!

കടപ്പാട്: നാസ

ഇതാ ഇപ്പോൾ വാലുമുറിഞ്ഞവരെല്ലാം കൂടി സൗരയൂഥത്തിനും വാലു കണ്ടെത്തിയിരിക്കുന്നു. വാൽനക്ഷത്രങ്ങൾക്കു മാത്രമല്ല ചില നക്ഷത്രങ്ങൾക്കും വാലുണ്ടെന്ന് മുമ്പുതന്നെ കണ്ടെത്തിയിരുന്നു. ഇതാ ഇപ്പോൾ സൗരയൂഥത്തിനും വാലു കണ്ടെത്തിയിരിക്കുന്നു. നാസയുടെ ഐബെക്സ്(Interstellar Boundary Expolrer) എന്ന പേടകത്തിൽ നിന്നു ലഭിച്ച വിവരങ്ങൾ വിശകലനം ചെയ്താണ് ഡേവിഡ് മൿകോമാസിന്റെ നേതൃത്വത്തിലുള്ള ശാസ്ത്രസംഘം ഈ കണ്ടെത്തൽ നടത്തിയിരിക്കുന്നത്.
    രണ്ടുതരത്തിലുള്ള ചാർജ്ജ്രഹിത കണങ്ങളാണ് ഈ വാലിലുള്ളത് എന്നാണ് ജൂലൈ പത്തിനു ആസ്ട്രോഫിസിക്സ് ജേർണലിൽ പ്രസിദ്ധീകരിച്ചിട്ടുള്ള ഈ പഠനത്തിൽ പറയുന്നത്. രണ്ടു വശങ്ങളിലൂടെ ഒഴുകുന്ന വേഗത കുറഞ്ഞ കണങ്ങളും മുകളിലും താഴെയുമായി ഒഴുകുന്ന വേഗത കൂടിയ കണങ്ങളുമടങ്ങിയതാ സൗരയൂഥത്തിന്റെ വാല്. സൗരയൂഥത്തിന്റെ അതിരായ ഹീലിയോസ്ഫിയറിനും പുറത്തേക്ക് നീണ്ടുപോകുന്ന ഈ വാലിന് ഹീലിയോസ്‌ടെയിൽ എന്നാണ് പേര് നൽകിയിരിക്കുന്നത്. 
    മറ്റു ദൂരദർശിനികൾക്കൊന്നും കണ്ടെത്താൻ കഴിയാതിരുന്ന ഈ വാല് എനർജെറ്റിക് ന്യൂട്രൽ ആറ്റം ഇമേജിങ് എന്ന സാങ്കേതികവിദ്യ ഉപയോഗിച്ചാണ് ഐബക്സ് കണ്ടെത്തിയത്.

2013, ജൂലൈ 2, ചൊവ്വാഴ്ച

ജൂലൈ മാസത്തിലെ ആകാശം

2013 ജൂലൈ മാസം 15൹ രാത്രി 8മണിക്ക് മദ്ധ്യകേരളത്തില്‍ കാണാന്‍ കഴിയുന്ന ആകാശദൃശ്യം.

* ജൂലൈ 5: ഭൂമി സൂര്യനില്‍ നിന്നും ഏറ്റവും അകലെ
* ജൂലൈ 6: ചന്ദ്രനും ചൊവ്വയും അടുത്തുവരുന്നു.
* ജൂലൈ 7: ചന്ദ്രനും വ്യാഴവും അടുത്തു വരുന്നു.
* ജൂലൈ 8: അമാവാസി
* ജൂലൈ 10: ശുക്രനും ചന്ദ്രനും അടുത്തു വരുന്നു.
* ജൂലൈ 17: ശനിയും ചന്ദ്രനും അടുത്തു വരുന്നു.
* ജൂലൈ 27: പൗര്‍ണ്ണമി.

8 ജൂലൈ 2011 അറ്റ്ലാന്റിസ് ബഹിരാകാശപേടകം അതിന്റെ അവസാനത്തെ ദൗത്യം ആരംഭിച്ചു
19 ജൂലൈ 1938 ജയന്ത് നാര്‍ളീകര്‍ ജനിച്ചു
21 ജൂലൈ 1969 മനുഷ്യന്‍ ചന്ദ്രനില്‍
21 ജൂലൈ 2011 അറ്റ്ലാന്റിസ് ബഹിരാകാശ പേടകം അവസാന ദൗത്യം പൂര്‍ത്തിയാക്കി ഭൂമിയില്‍ തിരിച്ചെത്തി
31 ജൂലൈ 1971 ആദ്യത്തെ ലൂണാര്‍ റോവര്‍ ചന്ദ്രനില്‍









2013, ജൂൺ 19, ബുധനാഴ്‌ച

ശനിയിൽ നിന്നൊരു ഭൂചിത്രം!



തലക്കെട്ടിൽ അൽപം അതിശയോക്തി ചേർത്തിട്ടുണ്ട്. ക്ഷമിക്കുക. ശനിയിൽ നിന്നല്ല; ശനിയുടെ സമീപത്തു നിന്നാണ് ഈ ചിത്രം എടുത്തിട്ടുള്ളത്. ശനിയെ ഭ്രമണം ചെയ്തുകൊണ്ടിരിക്കുന്ന കാസ്സിനി എന്ന ബഹിരാകാശപേടകമാണ് ശനിയുടെ പശ്ചാത്തലത്തിലുള്ള ഭൂമിയുടെ ഫോട്ടോ എടുത്തിട്ടുള്ളത്. ഇതിനു മുമ്പും രണ്ടു പ്രാവശ്യം കാസ്സിനി ഭൂമിയുടെ ഫോട്ടോ എടുത്തിട്ടുണ്ട്. എന്നാൽ ഇപ്രാവശ്യത്തേതിനുള്ള പ്രത്യേകത ഭൂമിയെ അതിന്റെ ശരിയായ നിറത്തിൽ തന്നെ ഈ ചിത്രത്തിൽ കാണാം എന്നതാണ്. 144 കോടി കി.മീറ്റർ അകലെ നിന്നെടുത്ത ഈ ചിത്രം കാസ്സിനി ബഹിരാകാശ പേടകം നമുക്കു നൽകിയ ഒരു അമൂല്യമായ സംഭാവനായാണ്.

2013, ജൂൺ 18, ചൊവ്വാഴ്ച

തൊഴിൽശാലയിൽ നിന്ന് ആകാശം തൊട്ട വനിത


മ്പതു വർഷങ്ങൾക്കു മുമ്പ് ജൂൺ 16൹ ലോകചരിത്രത്തിൽ ആദ്യമായി ഒരു വനിത ബഹിരാകാശത്തേക്ക് പറന്നുയർന്നു. അതിനു ശേഷം പല സ്ത്രീകളും ബഹിരാകാശത്തേക്ക് യാത്ര ചെയ്യുകയുണ്ടായി. എന്നാൽ ലോകചരിത്രത്തിൽ ഒരു തുണിമിൽ തൊഴിലാളി ബഹിരാകാശയാത്ര നടത്തിയ സംഭവം അതിനു ശേഷവും സംഭവിച്ചില്ല. വാലൻറീന തെരഷ്കോവ 1963ൽ ബഹിരാകാശയാത്ര നടത്തുമ്പോൾ റഷ്യയിലെ ക്രാസ്നി പെരികോപ് ടെക്സ്റ്റൈൽ ഫാക്റ്ററിയിലെ തൊഴിലാളിയായിരുന്ന അവർക്ക് 26വയസ്സുമാത്രമായിരുന്നു പ്രായം.

1937 മാർച്ച് 6൹ റഷ്യയിലെ ഒരു ചെറുപട്ടണമായ മാസ്ലെന്നികോവോയിലാണ് വാലൻറീന ജനിച്ചത്. അച്ഛൻ ഒരു ട്രാക്റ്റർ ഡ്രൈവറും അമ്മ തുണിമില്ലിലെ തൊഴിലാളിയുമായിരുന്നു. ചെറുപ്പത്തിൽ തന്നെ അവർ പാരച്യൂട്ട് ഉപയോഗിക്കാൻ പഠിച്ചിരുന്നു. അന്നത്തെ റഷ്യയിൽ ചെറുപട്ടണങ്ങളിൽ പോലും പാരച്യൂട്ട് ക്ലബ്ബുകൾ സർവ്വസാധാരണമായിരുന്നു. ഇരുപത്തിരണ്ടാമത്തെ വയസ്സിൽ തന്നെ അവർ തന്റെ ആദ്യത്തെ പാരച്യൂട്ട് ചാട്ടം നടത്തിയിരുന്നു.

ആദ്യത്തെ ബഹിരാകാശയാത്രികയാവാൻ അപേക്ഷ അയച്ചവരുടെ എണ്ണം 400 ആയിരുന്നു. ഇതിൽ നിന്ന് യൂറി ഗഗാറിന്റെ നേതൃത്വത്തിലുള്ള ഒരു സംഘം അഞ്ചു പേരെ തെരഞ്ഞെടുത്തു. താത്യാന കുസ്നെത്‌സോവ, ഇറിന സോളൊവ്‌യോവ, സാന്നാ യോർക്കിന, വാലൻറീന പോളോമര്യോവ, വാലൻറീന തെരഷ്കോവ എന്നിവരായിരുന്നു അവർ. ഏതാനും മാസങ്ങൾ നീണ്ടുനിന്ന കഠിനപരിശീലനങ്ങൾക്കു ശേഷം ഇവരിൽ നിന്ന് വാലൻറീന പോളോമര്യോവ, വാലൻറീന തെരഷ്കോവ എന്നിവരെ തെരഞ്ഞെടുത്തു.

വോസ്ടോക് 5, 6 പേടകങ്ങളിൽ ഒന്നിനു പുറകെ ഒന്നായി വാലൻറീന തെരഷ്കോവ, വാലൻറീന പോളോമര്യോവ എന്നിവരെ അയക്കുവാനായിരുന്നു ആദ്യം നിശ്ചയിച്ചിരുന്നത്. എന്നാൽ പിന്നീട് തീരുമാനം മാറ്റുകയും വോസ്ടോക് 5ൽ വലേറി ബയ്‌കോവ്സ്കി എന്ന പുരുഷസഞ്ചാരിയേയും വോസ്ടോക് 6ൽ വാലൻറീന തെരഷ്കോവയെയും അയക്കുകയാണുണ്ടായത്.

  ആദ്യം തെരഞ്ഞെടുത്ത അഞ്ചു പേരിൽ തെരഷ്കോവയൊഴിച്ച് ബാക്കി നാലുപേരും ബിരുദപഠനവും സാങ്കേതികവിദ്യാഭ്യാസവും നേടിയവരായിരുന്നു. എന്നിട്ടും അന്നത്തെ സോവിയറ്റ് യൂണിയൻ പ്രസിഡന്റായ നികിത ക്രൂഷ്ചേവിന്റെ താൽപര്യപ്രകാരമാണത്രെ രണ്ടാം ലോകമഹായുദ്ധത്തിൽ മരിച്ച ട്രാക്റ്റർ ഡ്രൈവറുടെ പുത്രിയെ തന്നെ തെരഞ്ഞെടുത്തത്. അങ്ങനെ വാലൻറീന തെരഷ്കോവയുടെ രണ്ടു ദിവസവും 23 മണിക്കൂറും 12 മിനിറ്റും നീണ്ടു നിന്ന യാത്ര ബഹിരാകാശ ചരിത്രത്തിൽ ഇടം നേടി
 

2013, മേയ് 3, വെള്ളിയാഴ്‌ച

ഈ മാസത്തെ ആകാശം

കടപ്പാട്: വിക്കിപ്പീഡിയ

ഈ ബുധൻ, ശുക്രൻ, ചൊവ്വ എന്നീ ഗ്രഹങ്ങൾ സൂര്യനോടൊപ്പമായതു കൊണ്ട് മാസത്തിന്റെ ആദ്യപാതിയിൽ ഇവയെ കാണാൻ പ്രയാസമായിരിക്കും. എന്നാൽ ഈ മാസത്തിന്റെ അവസാന ദിവസങ്ങളിൽ ബുധനും ശുക്രനും വ്യാഴത്തോടു ചേർന്നു നിൽക്കുന്ന മനോഹര ദൃശ്യം നമുക്കു കാണാം. സൂര്യാസ്തമനത്തിനു ശേഷം പടിഞ്ഞാറ്  ഇടവം രാശിയിൽ വ്യാഴത്തിനെ കാണാം. ശനിയെ കിഴക്കു ഭാഗത്ത് തുലാം രാശിയിൽ കാണാം.

മെയ് 10൹ പടിഞ്ഞാറൻ ആസ്ട്രേലിയയിൽ വലയസൂര്യഗ്രഹണം ദൃശ്യമാകും. ഗ്രഹണം ദൃശ്യമാകുന്ന പ്രദേശത്തിന്റെ മാപ്പ് ഇവിടെ. മെയ് 23൹ ചന്ദ്ര-ശനി സംഗമം. മെയ് 26൹ ബുധൻ, ശുക്രൻ, വ്യാഴം എന്നീ ഗ്രഹങ്ങളുടെ സംഗമം.


2013, ഏപ്രിൽ 23, ചൊവ്വാഴ്ച

നൂറ്റാണ്ടിന്റെ വാൽനക്ഷത്രം അടുത്തു വരുന്നു.

കടപ്പാട്: നാസ




ഈ നൂറ്റാണ്ടിന്റെ വാൽനക്ഷത്രമെന്ന് വിശേഷിപ്പിക്കപ്പെടുന്ന വാൽനക്ഷത്രം ഐസോൺ(C/2012 S1) സൂര്യനോട് അടുത്തു വന്നുകൊണ്ടിരിക്കുന്നു. ഹബിൾ ബഹിരാകാശ ദൂരദർശിനി എടുത്ത ഐസോണിന്റെ ചിത്രമാണ് മുകളിൽ കൊടുത്തിരിക്കുന്നത്. 2013 ഏപ്രിൽ മാസം 10നാണ് ഇതെടുത്തത്. ഹബിളിന്റെ വൈഡ് ഫീൽഡ് കാമറ 3 ഉപയോഗിച്ചാണ് ഈ ചിത്രമെടുത്തിട്ടുള്ളത്. ഇതെടുക്കുന്ന സമയത്ത് ഐസോണിന്റെ സൂര്യനിൽ നിന്നുള്ള ദൂരം 62കോടി 10ലക്ഷം കി.മീറ്ററും ഭൂമിയിൽ നിന്നുള്ള ദൂരം 63കോടി 40ലക്ഷം കി.മീറ്ററും ആണ്. അതായത് വ്യാഴത്തെക്കാൾ അടുത്ത്.

2012 സെപ്റ്റംബർ മാസത്തിലാണ് ഐസോണിനെ കണ്ടെത്തുന്നത്. 2013 നവംബർ 28ന് ഇത് സൂര്യനോട് ഏറ്റവും അടുത്തെത്തുമ്പോൾ സൂര്യനുമായുള്ള ഇതിന്റെ അകലം 11,74,821കി.മീറ്റർ മാത്രമായിരിക്കും. സൂര്യന്റെ വ്യാസം 13,92,000കി.മീറ്ററാണ് എന്നു കൂടി ഓർക്കുക.

ഹബിൾ ചിത്രമെടുത്ത് വിശകലനം ചെയ്തതിന്റെ അടിസ്ഥാനത്തിൽ പുതിയ ചില വിവരങ്ങൾ കൂടി ഐസോണിനെ കുറിച്ച് ലഭിച്ചിട്ടുണ്ട്. ശിലാശകലങ്ങളും മഞ്ഞും നിറഞ്ഞ ഇതിന്റെ കേന്ദ്രഭാഗത്തിന് 5കി.മീറ്ററിൽ കൂടുതൽ വ്യാസമുണ്ടായിരിക്കും. സൂര്യന്റെ സമീപസ്ഥമാവുമ്പോൾ സൂര്യതാപം മൂലം ഇതിലെ ലോഹീയഘടകങ്ങൾ വികസിക്കുകയും മഞ്ഞ് ബാഷ്പീകരിക്കുകയും ചെയ്യുന്നതിന്റെ ഫലമായി കോമയുടെ കുറുകെയുള്ള വലിപ്പം 5,000കി.മീറ്ററായി മാറും. അതായത് ആസ്ട്രേലിയയുടെ ഒരു മടങ്ങിലേറെ വലിപ്പം! പൊടിപടലങ്ങൾ നിറഞ്ഞ വാലിന് 92,000കി.മീറ്ററിലേറെ നീളവും!!

2013, ഏപ്രിൽ 4, വ്യാഴാഴ്‌ച

എസ്.എൻ.വിൽസൺ: ഏറ്റവും ദൃരെയുള്ള സൂപ്പർനോവ

Compass and Scale Image for SN UDS10Wil
കടപ്പാട്: ഹബ്ബിൾ സൈറ്റ്

ഹബ്ബിൾ ബഹിരാകാശ ദൂരദർശിനി അതിന്റെ ചരിത്രത്തിൽ ഒരു പുതിയ റെക്കോർഡ് കൂടി കരസ്ഥമാക്കി. ഏറ്റവും ദൂരെയുള്ള ഒരു സൂപ്പർ നോവയെ കണ്ടെത്തിക്കൊണ്ടാണ് ഇപ്പോൾ ഹബ്ബിൾ വാർത്തയിൽ ഇടം പിടിച്ചിരിക്കുന്നത്. 1000 കോടി വർഷങ്ങൾക്കപ്പുറത്തുള്ള എസ്.എൻ. വിൽസൺ എന്ന് നാമകരണം ചെയ്തിരിക്കുന്ന SN UDS10Wilമോ സൂപ്പർനോവയെയാണ് ഇപ്പോൾ ഹബ്ബിൾ കണ്ടെത്തിയിരിക്കുന്നത്. ഇത്രയും വർഷം മുമ്പുള്ള പ്രപഞ്ചത്തെ കുറിച്ചുള്ള പഠനങ്ങളെ ഈ കണ്ടെത്തൽ സഹായിക്കും. കൂടാതെ ഇതൊരു ടൈപ്പ് 1a ഇനത്തിൽ പെട്ട സൂപ്പർനോവയായതു കൊണ്ട് പ്രപഞ്ചത്തിലെ ശ്യാമോർജ്ജത്തെ കുറിച്ചുള്ള പഠനത്തെയും ഇത് സഹായിക്കുമത്രെ. 

1382 കോടി വർഷം പ്രായം കണക്കാക്കിയിരിക്കുന്ന പ്രപഞ്ചത്തിലെ ഏറ്റവും പഴയ സൂപ്പർനോവകളെ കണ്ടെത്തുന്നതിനുള്ള ഹബ്ബിളിന്റെ ത്രിവർഷ പദ്ധതി 2010ലാണ് തുടങ്ങിയത്. ബാൾട്ടിമോറിലെ ആഡം റീസിന്റെ നേതൃത്വത്തിലുള്ള ഒരു സംഘമാണ് ഇതിനു നേതൃത്വം നൽകുന്നത്. അതിന്റെ ഫലങ്ങളാണ് ഇപ്പോൾ ലഭിച്ചുകൊണ്ടിരിക്കുന്നത്. ഹബ്ബിളിൽ ഘടിപ്പിച്ചിരിക്കുന്ന വൈഡ് ഫീൽഡ് 3 ക്യാമറയാണ് ഇത്രയും വിശദാംശങ്ങളുള്ള ചിത്രം ശാസ്ത്രജ്ഞർക്ക് ലഭ്യമാക്കിയത്.

പ്രപഞ്ചത്തിന്റെ വികാസനിരക്കിനെ മനസ്സിലാക്കുന്നതിൽ സൂപ്പർനോവകൾ വളരെയേറെ സഹായിക്കും. 240 കോടി വർഷങ്ങൾക്കും 1000 കോടി വർഷങ്ങൾക്കും ഇടയിലുള്ള നൂറിലേറെ സൂപ്പർനോവകളെ റീസും സംഘവും ഇതിനകം കണ്ടെത്തിക്കഴിഞ്ഞു, ഇതിൽ എസ്.എൻ.വിൽസൺ അടക്കം 8എണ്ണം ടൈപ്പ് 1എ ഇനത്തിൽ പെട്ടവയാണ്.

ഇതുവരെ കണ്ടെത്തിയവയും ഇനിയും കണ്ടെത്താനുള്ളവയുമായ സൂപ്പർനോവകൾ പ്രപഞ്ചത്തെ കുറിച്ച് കൂടുതൽ അറിവുകൾ നമുക്കു പകർന്നു നൽകും. ഇത്തരം സൂപ്പർനോവകളിലാണ് ഗ്രഹങ്ങളുടെയും ജീവന്റെയും സൃഷ്ടിക്കാവശ്യമായ ഘനമൂലകങ്ങൾ സൃഷ്ടിക്കപ്പെടുന്നത്. അതുകൊണ്ടാണ് സൂപ്പർനോവകളെ കുറിച്ചുള്ള പഠനം നമ്മളെ കുറിച്ചുള്ള പഠനം കൂടിയാവുന്നത്.

2013, ഏപ്രിൽ 2, ചൊവ്വാഴ്ച

ഏപ്രിൽ മാസത്തെ ആകാശം

കേരളത്തിൽ ഈ മാസം രാത്രി 8.30ന് കാണാൻ കഴിയുന്ന ആകാശദൃശ്യം. വ്യാഴത്തെ ഇടവം രാശിയിലും ശനിയെ തുലാം രാശിയിലും കാണാം. ഇടവം, മിഥുനം, കർക്കിടകം, ചിങ്ങം, കന്നി എന്നീ സൗരരാശികളും വേട്ടക്കാരൻ, സപ്തർഷിമണ്ഡലം എന്നീ പ്രധാന ഗണങ്ങളും കാണാൻ കഴിയും. ഒരു ദൂരദർശിനിയുടെ സഹായത്താൽ ഒറിയൺ നെബുലയെ കാണാൻ കഴിയും. ഗ്രീക്ക് മിഥോളജിയിൽ ഒറിയൺ ഒരു വേട്ടക്കാരനായിരുന്നുവെങ്കിൽ ബാബിലോണിയക്കാർക്ക് ഇത് സ്വർഗ്ഗത്തിലെ ആട്ടിടയനായിരുന്നു. ഋഗ്വേദത്തിൽ ഇതിനെ ഒരു മാനായാണ് കണക്കാക്കിയിരിക്കുന്നത്. ഇതിന്റെ തലയാണ് മകീര്യം അഥവാ മൃഗശീർഷം. അരപ്പട്ടയിലെ നടുവിലെ നക്ഷത്രവും മകീര്യത്തിലെ നടുവിലെ നക്ഷത്രവും കൂട്ടിവരച്ചാൽ തെക്കുവടക്കു ദിശ കൃത്യമായറിയാൻ കഴിയും. പുരാതനകാലത്ത് കപ്പൽ യാത്രക്കാരും മരുഭൂമിയിലൂടെ സഞ്ചരിക്കുന്ന വണിക്കുകളും ദിശയറിയാൻ ഈ രീതി ഉപയോഗിച്ചിരുന്നു. തിരുവാതിരയും റീഗളുമാണിതിലെ ഏറ്റവും തിളക്കം കൂടിയ നക്ഷത്രങ്ങൾ. തിരുവാതിര ഒരു ചുവപ്പുഭീമൻ നക്ഷത്രവും റീഗൽ ഒരു നീലഭീമൻ നക്ഷത്രവുമാണ്.

2013, ഫെബ്രുവരി 22, വെള്ളിയാഴ്‌ച

സുന്ദരബുധൻ


കടപ്പാട് : NASA
ബുധനെ പടിക്കാനായി  പുറപ്പെട്ടു പോയ മെസഞ്ചർ എടുത്ത ബുധന്റെ ചിത്രമാണിത്. എങ്ങനെയുണ്ട്? പക്ഷെ ഇങ്ങനെ വർണ്ണാഭമായി ബുധനെ കാണാൻ മനുഷ്യനേത്രങ്ങൾക്കു കഴിയില്ല. അതുകൊണ്ട് അതിന്റെ രാസഘടകങ്ങൾക്കും ഭൗതികസവിശേഷതകൾക്കും അനുസൃതമായി ലാബിൽ വെച്ചു തയ്യാറാക്കിയ ഫാൾസ് കളർ ഇമേജ് ആണിത്.

Get

Blogger Falling Objects