2012, നവംബർ 2, വെള്ളിയാഴ്‌ച

ഈ മാസത്തെ ആകാശം

മാസം രാത്രി 8.30ന് മദ്ധ്യകേരളത്തിൽ കാണാൻ കഴിയുന്ന നക്ഷത്ര ദൃശ്യം.
പ്രധാന സംഭവങ്ങൾ
* 13:- അമാവാസി. ആസ്ട്രേലിയയിലും ന്യൂസിലാന്റിലും   സൂര്യഗ്രഹണം 
*  17,18:- ചിങ്ങക്കൊള്ളി-ഉൽക്കാവർഷം
* 27:- ശുക്രനും ശനിയും അടുത്തുവരുന്നു. സൂര്യോദയത്തിനു മുമ്പ് കിഴക്കൻ ചക്രവാളത്തിൽ ഒരു ഡിഗ്രി അകലത്തിൽ ഇവയെ കാണാം.
* 28:- പൗർണ്ണമി
   

2012, ഒക്‌ടോബർ 30, ചൊവ്വാഴ്ച

ക്യൂരിയോസിറ്റി ചൊവ്വയിലെ മണ്ണിന്റെ രുചിയറിയുന്നു

      
credit: NASA
     ക്യൂരിയോസിറ്റി മാർസ് റോവർ ചൊവ്വയിലെ മണ്ണിന്റെ വിരലടയാളങ്ങൾ ശേഖരിച്ചു തുടങ്ങി. കെമിസ്ട്രി ആന്റ് മിനറോളജി ഇൻസ്ട്രമെന്റ് (CheMin) ഉപയോഗിച്ച് നടത്തിയ പരീക്ഷണങ്ങളിൽ നിന്ന് ചൊവ്വയിലെ മണ്ണിന് ഹവായിയിലെ അഗ്നിപർവ്വതശിലാപടലങ്ങളോട് സാമ്യമുള്ളതായി കണ്ടെത്തി.
      എക്സ്-റെ ഡിഫ്രാക്‌ഷൻ അനലൈസിസ് മാർഗ്ഗം ഉപയോഗിച്ച് ആദ്യമായി നടത്തിയ പഠനമാണ് ചൊവ്വയിലെ മണ്ണിന്റെ ഘടനയെ കുറിച്ചുള്ള പുതിയ വിവരങ്ങൾ നമുക്കു നൽകിയിരിക്കുന്നത്. ഇത് ചൊവ്വയുടെ ഭൂതകാല പാരിസ്ഥിതികാവസ്ഥകളെ കുറിച്ചുള്ള അറിവുകൾ രൂപീകരിക്കുന്നതിന് ശാസ്ത്രജ്ഞരെ സഹായിക്കും. മണ്ണിലടങ്ങിയിരിക്കുന്ന ഓരോ ധാതുക്കളെ കുറിച്ചു കിട്ടുന്ന അറിവുകളും അവ രൂപം കൊണ്ട പശ്ചാത്തലത്തെ കുറിച്ചുകൂടി വിവരം നൽകുന്നതായിരിക്കും.
     ചെമിനിൽ (CheMin) ഉപയോഗിച്ചിരിക്കുന്ന എക്സ്‌-റെ വിശകലന സംവിധാനം ഭൗമശാസ്ത്രജ്ഞർ വലിയ ലബോറട്ടറി സൗകര്യങ്ങൾ ഉപയോഗിച്ചു ചെയ്യുന്നതാണ്. ചൊവ്വയിൽ പക്ഷെ ഇത് ആദ്യമായാണ് ഉപയോഗപ്പെടുത്തുന്നത്. മുമ്പുപയോഗിച്ച മാർഗ്ഗങ്ങളെ അപേക്ഷിച്ച് ഇത് കൂടുതൽ മെച്ചപ്പെട്ട വിവരങ്ങൾ നൽകുന്നതിന് സഹായിക്കും.
      0.006 ഇഞ്ച് മാത്രം വലിപ്പമുള്ള പൊടികളെയാണ് ക്യൂരിയോസിറ്റി ഈ പഠനത്തിനു വേണ്ടി തെരഞ്ഞെടുത്തത്. ഇത് ചൊവ്വയിലെ പൊടിക്കാറ്റു വഴി എല്ലായിടത്തും വ്യാപിക്കുന്നതും എന്നാൽ കൂടുതലും അതാതിടങ്ങളിൽ തന്നെ രൂപം കൊണ്ടതുമായിരിക്കും. ഏതാനും ആഴ്ചകൾക്കു മുമ്പ് ക്യൂരിയോസിറ്റി വിശകലനം ചെയ്ത കോഗ്ലോമെറേറ്റ് ശിലകൾ ശതകോടി വർഷങ്ങൾക്കു മുമ്പ് രൂപം കൊണ്ടവയും ഒഴുക്കു വെള്ളം കൊണ്ടു ആകൃതി പ്രാപിച്ചവയുമാണ്. എന്നാൽ ചെമിൻ പരിശോധിച്ച പൊടിപടലങ്ങൾ താരതമ്യേന അടുത്ത കാലത്ത് രൂപം കൊണ്ടവയും ജലസ്പർശമേൽക്കാത്തവയുമാണ്.
      ചൊവ്വാഗ്രഹം ആകെ പൊടിപടലങ്ങളാൽ മൂടപ്പെട്ടതാണ്. പക്ഷെ ഇവയെ കുറിച്ചുള്ള നമ്മുടെ അറിവ് പരിമിതമാണ്. ഈ പൊടിപടലങ്ങളെയും ശിലാഖണ്ഡങ്ങളെയും കുറിച്ച് കൂടുതൽ വിവരങ്ങൾ ലഭ്യമാവുന്നതോടെ ചൊവ്വയുടെ ചരിത്രം കൂടുതൽ വ്യക്തമാവും.

2012, ഒക്‌ടോബർ 26, വെള്ളിയാഴ്‌ച

ഒരു നക്ഷത്രം ഗ്രഹത്തെ തിന്നുന്നു


ദൂരെ ദൂരെയൊരു നക്ഷത്രം അന്റെ ഗ്രഹത്തെ വിഴുങ്ങുന്നതായി ശാസ്ത്രജ്ഞർ കണ്ടെത്തി. BD+48 740 എന്ന ഒരു ചുവപ്പു ഭീമൻ നക്ഷത്രം അതിന്റെ ഒരു ഗ്രഹത്തെ വിഴുങ്ങുന്നതാണ് മക്ഡൊണാൾഡ് ഒബ്സർവേറ്ററിയിലെ ഹോബി-എബർലി ദൂരദർശിനിയിൽ നിന്നും ലഭിച്ച വിവരങ്ങൾ വിശകലനം ചെയ്തപ്പോൾ ശാസ്ത്രജ്ഞർ കണ്ടത്.
     ഒരു നക്ഷത്രത്തിന്റെ അയുസ്സവസാനിക്കാറാകുമ്പോഴാണ് അത് ഒരു ചുവപ്പുഭീമനാകുന്നത്. തുടർച്ചയായ അണുസംയോജനം വഴി നക്ഷത്തിന്റെ അകത്തെ ഹൈഡ്രജൻ എരിഞ്ഞു തീരുകയും അവിടെ ഹീലിയം നിറയുകയും ചെയ്യും. ഈ സമയത്ത് ഹീലിയം അണുസംയോജനത്തിനാവശ്യമായ താപനില നക്ഷത്രത്തിന്റെ കോറിനകത്ത് ഉണ്ടായിരിക്കുകയില്ല. ഇതിന്റെ ഫലമയി ഊർജ്ജോൽപാദനത്തിൽ താൽക്കാലികമായി വിരാമം സംഭവിക്കുകയും പുറത്തേക്കുള്ള വികിരണത്തള്ളൽ കുറയുകയും ചെയ്യുന്നു. അപ്പോൾ ഗുരുത്വാകർഷബലം മേൽക്കൈ നേടുന്നതിനാൽ നക്ഷത്രം ചുരുങ്ങാൻ തുടങ്ങുന്നു. ഇങ്ങനെ ചുരുങ്ങി ചുരുങ്ങി അകത്തെ മർദ്ദവും താപനിലയും കൂടുകയും അത് നൂറു കെൽവിനിലെത്തുകയും ചെയ്യുമ്പോൾ ഹീലിയം അണുകേന്ദ്രങ്ങൾ സംയോജിച്ച് കാർബൺ അണുകേന്ദ്രങ്ങൾ ഉണ്ടാകുന്ന പ്രകൃയ തുടങ്ങുകയും ചെയ്യുന്നു. അതേസമയം തന്നെ പുറത്തുള്ള ഹൈഡ്രജൻ അണുകേന്ദ്രങ്ങളും സംയോജിച്ചു തുടങ്ങും. ഈ പ്രവർത്തനങ്ങളുടെ ഫലമായി ഉയർന്ന തോതിലുള്ള ഊർജ്ജോൽപാദനം ആരംഭിക്കുകയും പുറത്തേക്കുള്ള വികിരണത്തള്ളൽ കൂടുകയും ചെയ്യും. ഉൽപാദന വികിരണ നിരക്കുകൾ സമരസപ്പെടുത്തുന്നതിനു വേണ്ടി നക്ഷത്രം വികസിക്കാൻ തുടങ്ങും.   ഇങ്ങനെ വലുതാകുമ്പോൾ പ്രതലവിസ്തീർണ്ണം വർദ്ധിക്കുന്നതിനാൽ അതിന്റെ പ്രതലോഷ്മാവ് കുറയുകയും നിറം ചുവപ്പാവുകയും ചെയ്യും.
     ഇങ്ങനെ ഒരു നക്ഷത്രം ചുവപ്പു ഭീമനായി മാറുമ്പോൾ അതിന്റെ സമീപത്തു കിടക്കുന്ന ആന്തരിക ഗ്രഹങ്ങളെയെല്ലാം അത് ഉള്ളിലാക്കിക്കളയും. ഇതിനുള്ള ഒരു തെളിവാണ് ഇപ്പോൾ കിട്ടിയിരിക്കുന്നത്  500 കോടി വർഷങ്ങൾക്കു ശേഷം സൂര്യനും ഒരു ചുവപ്പു ഭീമനായി മാറും. ഇന്നുള്ളതിന്റെ 200 മടങ്ങ് വലിപ്പമായിരിക്കും അന്ന് സൂര്യനുണ്ടാകുക എന്നാണ് ശാസ്ത്രജ്ഞരുടെ നിഗമനം. അപ്പോൾ ബുധൻ, ശുക്രൻ, ഭൂമി എന്നിവയെല്ലാം സൂര്യനകത്താകും. എന്നാൽ ഇങ്ങനെ സംഭവിക്കില്ല എന്നു വിശ്വസിക്കുന്ന ഒരു വിഭാഗം ശാസ്ത്രജ്ഞരും ഉണ്ട്. ഭൂമി ചെറിയ തോതിലാണെങ്കിലും സൂര്യനിൽ നിന്നും അകന്നു പോകുകയാണെന്നും സൂര്യൻ ചുവപ്പുഭീമനാകുമ്പോഴേക്കും ഭൂമി സൂര്യനെത്തിപ്പിടിക്കാൻ കഴിയുന്നതിനുമപ്പുറത്തെത്തിയിരിക്കുമെന്നും അതിനാൽ ഭൂമി രക്ഷപ്പെടുമെന്നും ഇവർ പറയുന്നു. എന്നാൽ സൂര്യനെത്തിപ്പിടിക്കാൻ കഴിയുന്നതിനുമപ്പുറത്തേക്ക് രക്ഷപ്പെടാൻ ഭൂമിക്കു കഴിയില്ലെന്നും അതിനാൽ ആവിയായി ഭൂമി സൂര്യനിൽ വിലയം പ്രാപിക്കുക തന്നെ ചെയ്യുമെന്ന് ഇതിനെ എതിർക്കുന്നവർ പറയുന്നു.
     വ്യാഴത്തിന്റെ 1.6മടങ്ങ് വലിപ്പമുള്ള വാതകഭീമനാണ് BD+48 740. 500 കോടി വർഷങ്ങൾക്കു ശേഷം ഭൂമിയുടെ ഗതിയും ഇതുതന്നെയായേക്കാം എന്നതിനാൽ ഇപ്പോൾ നമുക്ക് ഈ ഗ്രഹത്തിന് ആദരാഞ്ജലികൾ അർപ്പിക്കാം.

2012, സെപ്റ്റംബർ 28, വെള്ളിയാഴ്‌ച

ചൊവ്വയിലെ ഒഴുകുന്ന ജലത്തിന് പുതിയ തെളിവുകൾ

credit: NASA

ചൊവ്വയിൽ ജലസമ്പന്നമായ അരുവികൾ ഉണ്ടായിരുന്നതിന് പുതിയ തെളിവുകൾ ക്യൂരിയോസിറ്റിയിൽ നിന്നും ലഭിച്ചു. ഒടുവിൽ അയച്ച കോംഗ്ലോമെറേറ്റ് ശിലാദ്രവ്യങ്ങളുടെ ചിത്രങ്ങളിൽ നിന്നാണ് പുതിയ തെളിവുകൾ ശാസ്ത്രജ്ഞർ കണ്ടെടുത്തത്. ഇത്തരത്തിലുള്ള മണൽത്തരികൾ ചൊവ്വയിൽ നിന്നും ലഭിക്കുന്നത് ആദ്യമായാണെന്ന് ശാസ്ത്രജ്ഞർ പറഞ്ഞു. സെക്കന്റിൽ മൂന്നടിയെങ്കിലും വേഗതയിൽ ജലമൊഴുകിയാൽ മാത്രമേ ഇത്തരത്തിലുള്ള മണൽത്തരികൾ  രൂപപ്പെടുകയുള്ളു എന്നാണവരുടെ അഭിപ്രായം.
     ചൊവ്വയിലെ നീർച്ചാലുകൾ ഉണ്ടായിരുന്നതിനുള്ള തെളിവുകൾ ഇതിനു മുമ്പും ചൊവ്വയിൽ നിന്നും കിട്ടിയിട്ടുണ്ട്. എന്നാൽ ഒഴുക്കിൽ പെട്ട് രൂപം കൊണ്ട ഇത്തരം മണൽത്തരികൾ ആദ്യമായാണ് കണ്ടെത്തുന്നത്. ഗെയിൽ ഗർത്തത്തിന്റെ അരികിൽ നിന്നാണ് ഈ മണൽത്തരികൾ കണ്ടെടുത്തിരിക്കുന്നത്. ഊറൽ പാളികളായാണ് ഇതിവിടെ സ്ഥിതിചെയ്യുന്നത്. Peace Vallis എന്നു നാമകരണം ചെയ്തിരിക്കുന്ന അരുവിയിലെ ഉരുണ്ടതും മിനുസമാർന്നതുമായ കോംഗ്ലോമെറേറ്റ് ശിലകൾ ഇവിടെ ദീർഘകാലം ജലപ്രവാഹം ഉണ്ടായിരുന്നതിന്റെ സാക്ഷ്യമായി വർത്തിക്കുന്നു.
     ഒഴുകുന്ന ജലം ജൈവികപദാർത്ഥങ്ങൾ നിലനിൽക്കുന്നതിനുള്ള ഒരു അടിസ്ഥാനഘടകമാണ്. ഇതിവിടെ ഉണ്ടെന്നുള്ളതിനുള്ള പുതിയ തെളിവുകൾ ചൊവ്വയിൽ ജീവസാന്നിദ്ധ്യം അന്വേഷിക്കുന്നതിന് കൂടുതൽ ആവേശം നൽകുന്നതയി ക്യൂരിയോസിറ്റി ശാസ്ത്രസംഘം പറഞ്ഞു. ഇതിനു മുമ്പ് ഇവിടെ നിന്ന് കണ്ടെത്തിയ കളിമണ്ണിന്റെയും സൾഫേറ്റ് ലവനങ്ങളുടെയും സാന്നിദ്ധ്യവും ചൊവ്വയിൽ ജീവനുണ്ടായിരുന്നു എന്ന അനുമാനത്തിലെത്താൻ സഹായിക്കുന്ന തെളിവുകളാണ്. എങ്കിലും ഇതുറപ്പിക്കണമെങ്കിൽ ഇനിയും കുറെ കൂടി പോകാനുണ്ട്.

2012, ജൂലൈ 20, വെള്ളിയാഴ്‌ച

അനന്തവിദൂരതയിലൊരു കുഞ്ഞുഗ്രഹം

കടപ്പാട്: നാസ
സൗരയൂഥേതര ഗ്രഹങ്ങളെ കുറിച്ചുള്ള അന്വേഷണം തുടങ്ങിയിട്ട് കാലമേറെയായി. ആയിരത്തിലേറെ ഗ്രഹങ്ങളെ സൗരയൂഥത്തിനു പുറത്തു കണ്ടെത്തുകയും ചെയ്തു. ഇവയിൽ ഭൂരിഭാഗവും ഭീമൻ വാതകഗ്രഹങ്ങളായിരുന്നു. കൊച്ചുഗ്രഹങ്ങളെ കണ്ടെത്തുക എന്നത് വളരെ പ്രയാസമേറിയ ജോലിയാണ്. അതുകൊണ്ടുതന്നെ കണ്ടെത്തിയ കുഞ്ഞുഗ്രഹങ്ങളുടെ എണ്ണം വളരെ കുറവാണുതാനും. എന്നാൽ ശാസ്ത്രജ്ഞരുടെ അഭിപ്രായം കൊച്ചുഗ്രഹങ്ങളായിരിക്കും എണ്ണത്തിൽ കൂടുതൽ എന്നാണ്. പ്രകാശവർഷങ്ങൾക്കപ്പുറത്തു നിൽക്കുന്ന അവയെ കണ്ടെത്തുക എളുപ്പമല്ല എന്നുമാത്രം.

എന്നാൽ ഇതിനിടയിലും ഒരു കൊച്ചുഗ്രഹത്തിന്റെ സാന്നിദ്ധ്യം ശാസ്ത്രജ്ഞർ തിരിച്ചറിഞ്ഞിരിക്കുന്നു. അതും ഭൂമിയേക്കാൾ വളരെ ചെറുത്. ഭൂസമാനഗ്രഹങ്ങളെ കണ്ടെത്തിയാൽ തന്നെ ആഹ്ലാദഭരിതരാകാറുള്ളവരുടെ കൈയ്യിലേക്ക് അതിനെക്കാൾ ചെറിയതൊന്നു കിട്ടിയാലുണ്ടാവുന്ന അവസ്ഥ എന്തായിരിക്കും? UCF-1.01 എന്നു പേരിട്ടിരിക്കുന്ന ഈ ഗ്രഹം സ്ഥിതിചെയ്യുന്നത് ഭൂമിയിൽ നിന്ന് 33 പ്രകാശവർഷങ്ങൾക്കപ്പുറത്താണ്. ഫ്ലോറിഡ സർവ്വകലാശാലയിലെ ശാസ്ത്രജ്ഞനായ കെവിൻ സ്റ്റീവൻസൻ പറഞ്ഞത് ഇപ്രകാരമാണ്: “വളരെ ചെറുതും വളരെ ചൂടേറിയതുമായ ഒരു ഗ്രഹം ഉണ്ടെന്നുള്ളതിന് വളരെ ശക്തമായ തെളിവുകൾ സ്പിറ്റ്സർ ബഹിരാകാശ ദൂരദർശിനിയുടെ സഹായത്താൽ ഞങ്ങൾക്കു ലഭ്യമായിരിക്കുന്നു.”

വളരെ യാദൃശ്ചികമായാണ് സ്റ്റീവൻസനും കൂട്ടരും ഭൂമിയുടെ വലിപ്പത്തിന്റെ മൂന്നിലൊന്നു മാത്രം വരുന്ന ഈ ഗ്രഹത്തെ കണ്ടെത്തുന്നത്. സ്പിറ്റ്സർ ഡാറ്റകൾ ഉപയോഗിച്ചുകൊണ്ട് GJ 436b എന്ന നെപ്ട്യൂൺ സമാന സൗരയൂഥേതരഗ്രഹത്തെ പഠിച്ചുകൊണ്ടിരിക്കുമ്പോഴാണ് ഒരു പ്രത്യേകഭാഗത്ത് നിന്നു വരുന്ന ഇൻഫ്രാറെഡ് കിരണങ്ങൾക്ക് വളരെ നേരിയ വ്യതിയാനം വരുന്നതായി അവർ കണ്ടെത്തിയത്. ഇത് കൂടുതൽ പഠനവിധേയമാക്കിയപ്പോഴാണ് പുതിയൊരു അത്ഭുതഗ്രഹത്തിന്റെ സാന്നിദ്ധ്യം തിരിച്ചറിയാനായത്.

ഇതിന്റെ വ്യാസം ഏതാണ്ട് 8400 കി.മീറ്റർ വരും. GJ 436 എന്ന മാതൃനക്ഷത്രത്തെ ഒരു വട്ടം പ്രദക്ഷിണം ചെയ്യാൻ 1.4ഭൂദിനങ്ങൾ മാത്രമേ ആവശ്യമുള്ളൂ. സൂര്യനും ബുധനും തമ്മിലുള്ള അകലത്തേക്കാൾ കുറഞ്ഞ ദൂരത്തിലാണ് GJ 436നും UCF-1.01നും എന്നതിനാൽ ഇതിന്റെ പ്രതലതാപം 600ഡിഗ്രി സെന്റിഗ്രേഡ് വരും. ഉരുകിയ പ്രതലത്തോടുകൂടിയ ഈ ഗ്രഹത്തിന് സ്വന്തമായി ഒരു അന്തരീക്ഷമില്ല.



2012, ജൂലൈ 2, തിങ്കളാഴ്‌ച

ജൂലൈയിലെ ആകാശം


ജൂലൈ 15ന് മദ്ധ്യകേരളത്തിൽ രാത്രി 8.30ന് കാണാൻ കഴിയുന്ന
ആകാശദൃശ്യം
ജൂലൈ 3: പൗർണ്ണമി
ജൂലൈ 19: അമാവാസി, ജയന്ത് വി. നാർലിക്കറിന്റെ ജന്മദിനം
ജൂലൈ 21: മനുഷ്യൻ ചന്ദ്രനിൽ ഇറങ്ങി(1969)
ജൂലൈ 28,29: ഡെൽറ്റ അക്വാറീഡ്സ് ഉൽക്കാവർഷം
ജൂലൈ 31: ആദ്യ ലൂണാർ റോവർ ചന്ദ്രനിൽ ഇറങ്ങി.(1971)

2012, ജൂൺ 17, ഞായറാഴ്‌ച

ഭൂമിക്ക് പുതിയൊരു മിഴികൂടി- പ്രപഞ്ചരഹസ്യങ്ങൾ കണ്ടറിയാൻ

credit: ESO


നമുക്ക് പ്രകാശരശ്മികളുടെ സഹായത്താൽ വസ്തുക്കളെ തിരിച്ചറിയാനുള്ള ഇന്ദ്രിയമാണ് കണ്ണുകൾ. കണ്ണുകളുടെ ശേഷികൂട്ടാൻ നമ്മൾ പല ഉപകരണങ്ങളെയും കൂട്ടുപിടിക്കാറുണ്ട്. അത്തരത്തിലുള്ള ഒരു ഉപകരണമാണ് ദൂരദർശിനി. ഗലീലിയോ ആകാശത്തേക്കു തിരിച്ച ആദ്യത്തെ ദൂരദർശിനി അതിന്റെ എത്രയോ തലമുറകളിലൂടെ വളർന്ന് ഇന്ന് ആദ്യത്തേതിനേക്കാൾ എത്രയോ മടങ്ങ് ശേഷിയും വലിപ്പവുമുള്ളതായിരിക്കുന്നു. ഗലീലിയോയുടെ പ്രാകാശിക ദൂരദർശിനിയുടെ സഹോദരിയായ പ്രതിഫലന ദൂരദർശിനിയാണ് ഇപ്പോൾ കൂടുതലായി ഉപയോഗിച്ചുവരുന്നത്. പ്രാകാശികദൂരദർശിനിയേക്കാൾ കാര്യക്ഷമത പ്രതിഫലനദൂരദർശിനിക്കാണ് എന്നതിതിനാലാണ് ഇത്. ഓരോ പുതിയ ദൂരദർശിനികൾ നിർമ്മിച്ചുകഴിയുമ്പോഴും അതിനെക്കാൾ മെച്ചപ്പെട്ട പുതിയൊരെണ്ണം നിർമ്മിക്കുന്നതിനുള്ള ആഗ്രഹം ശാസ്ത്രജ്ഞരിൽ അങ്കുരിച്ചു തുടങ്ങും. അങ്ങനെ ഇപ്പോൾ ഭൂമിയിലെ ഏറ്റവും വലിയ ദൂരദർശിനി നിർമ്മിക്കുന്നതിനുള്ള തയ്യാറെടുപ്പു തുടങ്ങിയിരിക്കുകയാണ് യൂറോപ്പിലെ ജ്യോതിശാസ്ത്രജ്ഞർ.

European Extremely Large Telescope(E-ELT) എന്ന പേരു നൽകിയിരിക്കുന്ന ഈ ദൂരദർശിനിയുടെ പ്രധാനദർപ്പണത്തിന് 40മീറ്റർ വ്യാസമുണ്ട്. പ്രപഞ്ചത്തിന്റെ അത്യഗാധങ്ങളിൽ നിന്നുള്ള പ്രകാശകണങ്ങളെ വരെ പിടിച്ചെടുക്കാനുള്ള ശേഷി ഇതിനുണ്ട്. സൗരയൂഥേതരഗ്രഹങ്ങളെ കുറിച്ചുള്ള കൂടുതൽ പടനങ്ങൾക്ക് ഇത് ഒരു മുതൽക്കൂട്ടാവും എന്നതിൽ സംശയമില്ല. ഭൂമിയെ പോലുള്ള ഗ്രഹങ്ങളെ കണ്ടെത്തൽ ഇനി കൂടുതൽ എളുപ്പമാവും. മഹാസ്ഫോടനത്തിനു ശേഷം ആദ്യമായി രൂപംകൊണ്ട താരാപഥങ്ങളെ കൂടുതൽ വിവരങ്ങൾ ലഭ്യമാക്കാൻ ഇതിനു കഴിയും. ഗലീലിയോയുടെ ദൂരദർശിനിയെക്കാൾ 80 ലക്ഷം മടങ്ങ് ശേഷിയുണ്ട് ഇ-ഇഎൽടിക്ക്. 1080 ദശലക്ഷം യൂറോ ചെലവു പ്രതീക്ഷിക്കുന്ന ഈ ദൂരദർശിനിയുടെ പ്രവർത്തനം 2020കളുടെ തുടക്കത്തിൽ തന്നെ തുടങ്ങാൻ സാധിക്കുമെന്ന പ്രതീക്ഷയിലാണ് ശാസ്ത്രജ്ഞർ.

ആസ്ട്രേലിയ, ബൽജിയം, ബ്രസീൽ, ചെക് റിപ്പബ്ലിക്, ഡന്മാർക്ക്, ഫ്രാൻസ്, ഫിൻലന്റ്, ജർമ്മനി, ഇറ്റലി, നെതർലന്റ്സ്, പോർട്ടുഗൽ, സ്പെയിൻ, സ്വീഡൻ, സ്വിറ്റ്സർലാന്റ്, ഇംഗ്ലണ്ട് എന്നീ രാജ്യങ്ങളാണ് ഈ സംരംഭത്തിന് ചുക്കാൻ പിടിക്കുന്നത്.

Loading player...


--ഉറവിടം: ESO

2012, ജൂൺ 6, ബുധനാഴ്‌ച

2012, ജൂൺ 5, ചൊവ്വാഴ്ച

ശുക്രംസതരണം-ഇനി മണിക്കൂറുകൾ ബാക്കി

2004ൽ നടന്ന ശുക്രസംതരണത്തിൽ ദൃശ്യമായ ശുക്രന്റെ അന്തരീക്ഷം(തിളങ്ങി കാണുന്നത്)


ഇനി ഏതാനും മണിക്കൂറുകൾ മാത്രമേ ബാക്കിയുള്ളു കാത്തിരുന്ന ആ അപൂർവ്വപ്രതിഭാസം സംഭവിക്കാൻ. ഇന്ത്യയിൽ രാവിലെ ആറുമണി മുതൽ കാണാൻ കഴിയും. ഭൂമിയുടെ പലഭാഗങ്ങളിൽ നിന്ന് ഈ പ്രതിഭാസം തത്സമയം പ്രക്ഷേപണം ചെയ്യാൻ ശാസ്ത്രസമൂഹം തയ്യാറെടുത്തു കഴിഞ്ഞു. ലോകത്തിന്റെ വ്യത്യസ്ത ഭാഗങ്ങളിൽ സംതരണം തുടങ്ങുന്ന സമയം തന്നെ അത് എല്ലാഭാഗത്തേക്കും എത്തിക്കൊണ്ടിരിക്കും.

ശുക്രന്റെ ചില രഹസ്യങ്ങൾ കൂടി ഈ സംതരണത്തോടെ പുറത്തു കൊണ്ടുവരാൻ കഴിയും എന്ന പ്രതീക്ഷയിലാണ് ശാസ്ത്രജ്ഞർ. ശുക്രൻ സൂര്യപശ്ചാത്തലത്തിലേക്ക് കടക്കുമ്പോൾ അതിന്റെ അന്തരീക്ഷം തിളക്കമാർന്ന് പ്രത്യക്ഷപ്പെടും. ഇതിലൂടെ കടന്നു വരുന്ന സ്പെക്ട്രം പരിശോധിച്ച് ശുക്രനെ കുറിച്ചുള്ള കുറെയേറെ വിവരങ്ങൾ മനസ്സിലാക്കാനാവുമെന്നാണ് പ്രതീക്ഷിക്കുന്നത്. വലിപ്പത്തിലും സൂര്യനുമായുള്ള അകലത്തിലും ഗ്രഹത്തിലുള്ള മൂലകങ്ങളുടെ കാര്യത്തിലും ഭൂമിയുമായി ഏറെ അടുപ്പം പുലർത്തുന്ന ശുക്രൻ പക്ഷെ സ്വഭാവത്തിൽ തന്റെ സഹോദരിയുമായി യാതൊരു ബന്ധവുമില്ല. ഹരിതഗൃഹവാതകമായ കാർബൺ ഡൈ ഓക്സൈഡിന്റെ ആധിക്യവും സൾഫ്യൂരിക് ആസിഡ് നിറഞ്ഞ അന്തരീക്ഷവും ഉയർന്ന അന്തരീക്ഷമർദ്ദവും എല്ലാം ഭൂമിയിൽ നിന്നും ഈ ഗ്രഹത്തെ വ്യത്യസ്തയാക്കുന്നു. ഈ സംതരണത്തോടെ കുറെ ചോദ്യങ്ങൾക്കെങ്കുലും ഉത്തരം കണ്ടെത്താൻ കഴിയും എന്നാണ് പ്രതീക്ഷിക്കുന്നത്.

തത്സമയം കാണാൻ കഴിയുന്ന ലിങ്കുകൾ:

ബഹിരാകാശത്തു നിന്നുള്ള ദൃശ്യം കാണാൻ:

ശുക്രസംതരണത്തെ കുറിച്ചുള്ള കൂടുതൽ വിവരങ്ങൾക്കും ക്ലാസ് റൂം പ്രവർത്തനങ്ങൾക്കും സന്ദർശിക്കുക:

എല്ലാവരും തയ്യാറായില്ലേ പ്രപഞ്ചമൊരുക്കുന്ന അപൂർവ്വദൃശ്യത്തിന് സാക്ഷിയാവാൻ


2012, ജൂൺ 1, വെള്ളിയാഴ്‌ച

സൂര്യശരീരത്തിലൂടെ ശുക്രസഞ്ചാരം




ജൂൺ ആറാം തീയതി വരാൻ കാത്തിരിക്കയാണ് ശാസ്ത്രലോകം. അപൂർവ്വമായി മാത്രം സംഭവിക്കുന്ന ജ്യോതിശാസ്ത്ര പ്രതിഭാസങ്ങളിലൊന്നിനാണ് അന്ന് ലോകം സാക്ഷിയാവുന്നത്. സൂര്യന്റെ മുന്നിലൂടെ ശുക്രൻ ഒരു കറുത്ത പൊട്ടുപോലെ കടന്നു പോകുന്നത് നമുക്ക് ഭൂമിയിലിരുന്ന് കാണാൻ കഴിയും. ഇനി 2117ലാണ് ഈ പ്രതിഭാസം ഭൂമിയിലിരുന്ന് കാണാൻ കഴിയൂ. ഇന്നു ജീവിച്ചിരിക്കുന്നവരിൽ പലർക്കും അതിനുള്ള ഭാഗ്യം ഉണ്ടാവാൻ സാദ്ധ്യതയില്ല. അതുകൊണ്ട് നമ്മുടെ കാലവർഷം ഏതെങ്കിലും വിധത്തിൽ നമ്മോട് സഹകരിക്കാൻ തീരുമാനിക്കുകയാണെങ്കിൽ തീർച്ചയായും നിങ്ങൾ ഈ അവസരം 'മിസ്' ചെയ്യരുത്. ജൂൺ ആറാം തിയ്യതി കേരളത്തിലുള്ളവർക്ക് സൂര്യോദയത്തോടുകൂടിത്തന്നെ സൗരോപരിതലത്തിലൂടെ ശുക്രൻ തുഴഞ്ഞു പോകുന്നത് കാണാൻ കഴിയും. ഒമ്പതര വരെ ഇതു നീണ്ടു നിൽക്കും. ഈ പ്രതിഭാസത്തെ ശുക്രസംതരണം(Transits of Venus) എന്നാണ് പറയുന്നത്.

എട്ടു വർഷത്തെ ഇടവേളയുള്ള ജോഡിയകളായാണ് ശുക്രസംതരണം സംഭവിക്കാറുള്ളത്. ഈ ഒരു ജോഡിക്കു ശേഷം പിന്നീട് നൂറ്റിഅഞ്ചര വർഷങ്ങൾക്കു ശേഷമാണ് പിന്നീട് മറ്റൊരു ശുക്രസംതരണം ഉണ്ടാവുക. ഇതിനു മുമ്പ് 2004 ജൂൺ 8നായിരുന്നു. ഒരു ശുക്രസംതരണം ഉണ്ടായത്. ഇനി അടുത്തത് 2117 ഡിസംബർ 11നാണ് ദൃശ്യമാകുക.

ശുക്രസംതരണം ആദ്യമായി ലോകശ്രദ്ധ പിടിച്ചുപറ്റുന്നത് 1761ലാണ്. സൂര്യനും ഭൂമിയും തമ്മിലുള്ള ദൂരം കൃത്യമായി അളന്നത് അന്നായിരുന്നു. എഡ്മണ്ട് ഹാലിയാണ് ഇതിനുള്ള ഗണിതസൂത്രം കണ്ടെത്തിയത്. ആദ്യമായി ശുക്രസംതരണം പ്രവചിച്ചത് കെപ്ലർ ആയിരുന്നു. പക്ഷെ ദൗർഭാഗ്യകരമെന്നു പറയട്ടെ അദ്ദേഹത്തിന്റെ ഗണനക്രിയകളിലെ ഏതോ ചെറിയ തകരാറുകൾ നിമിത്തം 1631ൽ നടക്കുമെന്ന് അദ്ദേഹം പ്രവചിച്ച ശുക്രസംതരണം ആ വർഷത്തിൽ ആർക്കും കാണാൻ കഴിഞ്ഞില്ല. ജർമിയാക് ഹൊറോക്സ് എന്ന ബ്രിട്ടീഷ് ശാസ്ത്രജ്ഞനാണ് ആദ്യമായി ഈ പ്രതിഭാസത്തെ കൃത്യമായി പ്രവചിക്കുകയും 1639 ഡിസംബറിൽ തന്റെ ടെലസ്കോപ്പുപയോഗിച്ച് കടലാസിൽ സൂര്യന്റെ പ്രതിബിംബം വീഴ്ത്തി നിരീക്ഷിക്കുകയും ചെയ്തത്.

സൂര്യന്റെ നേരെ നോക്കി ഇപ്രാവശ്യത്തെ ശുക്രസംതരണം നേരിട്ടു തന്നെ കണ്ടുകളയാം എന്നാരും വിചാരിക്കരുതേ! പിന്നീട് നിങ്ങൾക്കൊരിക്കലും പ്രകൃതിയുടെ മനോഹാരിത കാണാൻ അവസരം ലഭിച്ചു എന്നു വരില്ല. ഏറ്റവും സുരക്ഷിതമായ നിശ്ചിതനിലവാരമുള്ള സോളാർ ഫിൽറ്ററുകൾ ഉപയോഗിക്കുക എന്നതാണ്. മറ്റൊരു നല്ല മാർഗ്ഗം ഒരു കണ്ണാടിയെടുത്ത് അതിൽ ഒരു കറുത്ത കടലാസ് പതിക്കുക. ഈ കടലാസിന്റെ നടുവിൽ ഏകദേശം 5mm വ്യാസത്തിൽ ചെറിയൊരു ദ്വാരമുണ്ടാക്കിയിരിക്കണം. ഇത് വെയിലത്തു വെച്ച് ചുമരിലേക്ക് സൂര്യനെ പ്രതിബിംബിക്കാം. ചുമരും കണ്ണാടിയും തമ്മിലുള്ള അകലം ക്രമീകരിച്ച് ചുമരിലെ സൂര്യന്റെ വലിപ്പം നമുക്കിഷ്ടമുള്ള രീതിയിലാക്കാം. ഇനി ചുമരിൽ ഈ അപൂർവ്വപ്രതിഭാസം നമുക്കു ദർശിക്കാം. ഈ രീതിക്കുള്ള ഒരു പോരായ്മ വ്യക്തത കുറയുമെന്നതാണ്. എങ്കിലും കണ്ണുകളയുന്നതിനെക്കാൾ നല്ലത് ഇതായിരിക്കും. A#14വെൽഡേഴ്സ്ഗ്ലാസും ഉപയോഗിക്കാവുന്നതാണ്.

ഏതായാലും ഈ അവസരം എങ്ങനെയെങ്കിലും ഉപയോഗിക്കാൻ ശ്രമിക്കുക. കണ്ടതിന്റെ അനുഭവം പങ്കുവെക്കാൻ മറക്കരുതേ. കാലാവസ്ഥ നമ്മോടു സഹകരിക്കും എന്നുതന്നെ പ്രതീക്ഷിക്കാം. വിശ്വാസമല്ലേ എല്ലാം”




2012, ഏപ്രിൽ 19, വ്യാഴാഴ്‌ച

സൂര്യനിൽ മഴപെയ്യുന്നുവോ?







സൂര്യനിൽ മഴയോ? സംശയമുണ്ടെങ്കിൽ ഈ വീഡിയോ ഒന്നു കണ്ടുനോക്കൂ. സൂര്യനിൽ മഴ പെയ്യുന്നതു ശരിക്കും കാണാം.

"മറ്റുള്ളവർക്കായി സ്വയം കത്തിയെരിയുന്ന സുസ്നേഹമൂർത്തിയാം സൂര്യൻ" ഇപ്പോൾ കെട്ടുപോകുമോ എന്നാണു പേടിയെങ്കിൽ വേണ്ട. അവിടെ മഴയായി ഉതിർന്നു വീഴുന്നത് ജലകണങ്ങളല്ല, പ്ലാസ്മാ രൂപത്തിലുള്ള ദ്രവ്യകണങ്ങളാണ്. സൗരാന്തരീക്ഷ ദ്രവ്യ വിസ്ഫോടനവും (coronal mass ejection ) അതിന്റെ തിരികെ വീഴ്ചയുമാണ് ഇതിൽ കാണുന്നത്. വളരെ ശക്തിയായി പുറത്തേക്കു തെറിക്കുന്ന പ്ലാസ്മാ ദ്രവ്യകണങ്ങൾ സൂര്യന്റെ ഗുരുത്വവലിവു കാരണം അതിലേക്കു തന്നെ തിരിച്ചു വീഴുന്നു. അതേസമയം സൂര്യനിൽ നിന്നും പുറത്തേക്കുള്ള ഊർജ്ജപ്രവാഹത്തിന്റെ തള്ളൽ ഈ വീഴ്ചയുടെ വേഗത കുറയുന്നതിനു കാരണമാകുന്നു.

കഴിഞ്ഞ 16ന് ഉണ്ടായ ശക്തിയേറിയ ദ്രവ്യവിസ്ഫോടനത്തിന്റെ ദൃശ്യം ഹിനോഡെ ബഹിരാകാശ പേടകത്തിലെ സോളാർ ഓപ്റ്റിക്കൽ ടെലിസ്കോപ് ഉപയോഗിച്ചു പകർത്തിയതാണ് ഈ വീഡിയോ.

2012, ഏപ്രിൽ 10, ചൊവ്വാഴ്ച

നവഗ്രഹങ്ങളുമായി ഒരു നക്ഷത്രം!



സൗരയൂഥത്തിൽ നിന്ന് പ്ലൂട്ടോയെ പുറത്താക്കിയതോടെ നവഗ്രഹങ്ങൾ എന്ന പ്രയോഗം ജ്യോതിഷത്തിൽ മാത്രമായി ഒതുങ്ങിപ്പോയിരിക്കുകയായിരുന്നല്ലോ. എന്നാൽ ഇപ്പോഴിതാ ആ വിഷമം തീർക്കാൻ ഒരു നക്ഷത്രം ഒമ്പതു ഗ്രഹങ്ങളെ ചേർത്തു പിടിച്ചുകൊണ്ടെത്തിയിരിക്കുന്നു. ഭൂമിയിൽ നിന്നും 130 പ്രകാശവർഷം അകലെയുള്ള HD 10180 എന്ന നക്ഷത്രമാണ് നവഗ്രഹകൂട്ടായ്മയുമായി രംഗത്തെത്തിയിരിക്കുന്നത്.

Astronomy and Astrophysics എന്ന ജേർണലിലാണ് പുതിയ വിവരങ്ങൾ പ്രസിദ്ധപ്പെടുത്തിയിരിക്കുന്നത്. ചിലിയിലെ 3.6മീറ്റർ ഹാർപ്സ് (High Accuracy Radial Velocity Planet Searcher ) ടെലിസ്കോപ്പിൽ നിന്നും ലഭിച്ച വിവരങ്ങൾ വിശകലനം ചെയ്തപ്പോഴാണ് സൂര്യനോടു സമാനത പുലർത്തുന്ന HD 10180 എന്ന നക്ഷത്രത്തിനു ചുറ്റും ഒമ്പതു ഗ്രഹങ്ങൾ ഭ്രമണം ചെയ്യുന്നുണ്ടെന്ന വിവരം ലഭിച്ചത്. ഇതിലെ രസകരമായ വസ്തുത ഇതേ വിവരങ്ങൾ മുമ്പു വിശകലനം ചെയ്തതിൽ നിന്ന് ആറു ഗ്രഹങ്ങൾ തീർച്ചയായും ഉണ്ടെന്നും ഏഴാമതൊന്നു കൂടി ഉണ്ടാവാനുള്ള സാദ്ധ്യത ഉണ്ടെന്നുമുള്ള നിഗമനത്തിലായിരുന്നു ശാസ്ത്രജ്ഞർ എത്തിയിരുന്നത്. ഏഴാമത്തെ ഗ്രഹത്തിന്റെ കാര്യം തീർച്ചപ്പെടുത്തുന്നതിനു വേണ്ടി നടത്തിയ തുടർപഠങ്ങളിൽ നിന്നാണ് ഏഴല്ല ഗ്രഹങ്ങളുടെ എണ്ണം ഒമ്പതാണ് എന്ന തീർച്ചയിലെത്തിയത്.

ആദ്യം കണ്ടെത്തിയ ആറെണ്ണത്തിൽ അഞ്ചെണ്ണം ഭൂമിയെക്കാൾ 12 മുതൽ 25വരെ മടങ്ങു പിണ്ഡമുള്ളവയും ആറാമത്തേത് ഭൂമിയെക്കാൾ 65 മടങ്ങു പിണ്ഡമുള്ളതുമായിരുന്നു. പുതിയതായി കണ്ടെത്തിയ മൂന്നെണ്ണത്തിന്റെ പിണ്ഡം 1.3, 1.9, 5.1 ഭൂപിണ്ഡത്തിനു തുല്യമാണ്. ആദ്യത്തെ ഗ്രഹം അതിന്റെ മാതൃനക്ഷത്രമായ HD 10180 എന്ന നക്ഷത്രത്തിൽ നിന്ന് 3 ദശലക്ഷം കി.മീറ്റർ മാത്രം അകലത്തിലാണ് സ്ഥിതിചെയ്യുന്നത്. രണ്ടാമത്തെതാകട്ടെ 14 ദശലക്ഷം കി.മീറ്റർ അകലത്തിലും. ഇത് ബുധനും സൂര്യനും തമ്മിലുള്ള അകലത്തിനെക്കാൾ കുറവാണ്.

എന്തായാലും പ്ലൂട്ടോയെ പുറത്താക്കിയ പോലെ ഇതിലൊന്നിനേയും പുറത്താക്കാമെന്നു വിചാരിക്കേണ്ട. എല്ലാം ഭൂമിയേക്കാൾ വലിപ്പം കൂടിയവയാണ്


2012, ഏപ്രിൽ 8, ഞായറാഴ്‌ച

ചൊവ്വയിൽ ആനയോ?!




ഈ ചിത്രം ചൊവ്വയിൽ നിന്നെടുത്തതാണ്. നാസയുടെ മാർസ് റെക്കനൈസൻസ് ഓർബിറ്ററിലെ ശക്തികൂടിയ ഹൈറൈസ് (HiRISE) കാമറ ഉപയോഗിച്ച് എടുത്തതാണിത്. പിന്നെന്തിനു സംശയിക്കണം?

ചൊവ്വയിലെ എലീസിയം പ്ലാനീഷ്യ എന്ന പ്രദേശത്ത് 100മില്യൻ വർഷങ്ങൾക്കു മുമ്പ് അഗ്നിപർവ്വതം പൊട്ടി ഒഴുകിയ ലാവ ഉറഞ്ഞുണ്ടായ രൂപമാണിത്. ശരിക്കും ഒരു ആനത്തല! ഇതു പോലെ നിരവധി രൂപങ്ങൾ ചൊവ്വയിൽ നിന്ന് കണ്ടെടുത്തിട്ടുണ്ട്. ഇവ പലതും ചില മാധ്യമങ്ങൾ തെറ്റായി ഉപയോഗിക്കുകയും ചെയ്തിട്ടുണ്ട്. ഇങ്ങനെ രണ്ടുവർഷം മുമ്പ് വ്യാപകമായി പ്രചരിച്ചതായിരുന്നു ചൊവ്വയിൽ കരടിയെ കണ്ടെന്നത്. നമ്മുടെ രണ്ടു വലിയ മലയാളം ദേശീയപത്രങ്ങൾ(അങ്ങനെയാണ് അവർ അവകാശപ്പെടുന്നത്) ഇത് വളരെ ആഘോഷപൂർവ്വം കൊണ്ടാടുകയും ചെയ്തു.

പാരീഡോളിയ എന്നറിയപ്പെടുന്ന ഈ പ്രതിഭാസം നമ്മുടെ നിത്യജീവിതത്തിലും നാം പലപ്പോഴും കണ്ടിട്ടുണ്ടാവും‌--ആകാശത്തിലെ മേഘങ്ങളിൽ, ടാറിട്ട റോഡുകളിൽ മഴ പെയ്തു തോർന്നതിനു ശേഷം...

ഇങ്ങനെയുള്ള മറ്റു ചില ചിത്രങ്ങൾ ചൊവ്വയിൽ നിന്ന്---






2012, ഏപ്രിൽ 1, ഞായറാഴ്‌ച

ഏപ്രിൽ മാസത്തെ ആകാശവും വിശേഷങ്ങളും


ചുവന്ന നിറത്തിൽ കാണുന്നത് ക്രാന്തിവൃത്തം. നീലനിറത്തിൽ ഖമദ്ധ്യരേഖ

 ഏപ്രിൽ 15ന് രാത്രി 8.30ന് മദ്ധ്യകേരളത്തിൽ കാണാൻ കഴിയുന്ന ആകാശദൃശ്യം

ആകാശവിശേഷങ്ങൾ


ഏപ്രിൽ 6: പൗർണ്ണമി

ഏപ്രിൽ 15: ശനി ഓപ്പോസിഷനിൽ

ഏപ്രിൽ 21: അമാവാസി

ഏപ്രിൽ 21,22: ലൈറിഡ് ഉൽക്കാവർഷം

ഏപ്രിൽ 28: ജ്യോതിശാസ്ത്ര ദിനം




2012, മാർച്ച് 28, ബുധനാഴ്‌ച

എൻസിലാഡസ്സിൽ മൈക്രോബുകൾ?


Enceladusstripes cassini
കടപ്പാട്: വിക്കിമീഡിയ കോമൺസ്
എൻസിലാഡസ് വീണ്ടും ചർച്ചാവിഷയമാകുകയാണ്. ജീവൻ തന്നെയാണ് വിഷയം. 27ന് കാസ്സിനി ബഹിരാകാശ പേടകം എൻസിലാഡസ്സിന്റെ ദക്ഷിണധ്രുവത്തിന്റെ 74 കി.മീറ്റർ സമീപത്തുകൂടി കടന്നു പോയി പുതിയ ചില ചിത്രങ്ങൾ എടുത്ത് ഭൂമിയിലേക്കയക്കുകയുണ്ടായി. മഞ്ഞുമൂടിയ പുറംഭാഗത്തിനടിയിൽ ദ്രവരൂപത്തിലുള്ള ജലമാണുള്ളത്. ദക്ഷിണധ്രുവപ്രദേശത്തുള്ള ചില വിടവുകളിൽ കൂടി ഈ ജലം പുറത്തേക്ക് തെറിക്കാറുണ്ട്. ഇത് ദ്രാവകരൂപത്തിലും നീരാവിയായും മഞ്ഞുകണങ്ങളായും വരും. പുതിയചിത്രങ്ങളിൽ നിന്നും ലഭിച്ച ചില വിവരങ്ങൾ ഇവിടെ ഏകകോശജീവികൾ ഉണ്ടാകാനുള്ള സാദ്ധ്യതയിലേക്ക് വിരൽ ചൂണ്ടുന്നവയാണത്രെ!

വെറും 511.77 കി.മീറ്റർ മാത്രം വ്യാസമുള്ള ഒരു ചെറിയ ഉപഗ്രഹമാണ് ശനിക്ക് ചുറ്റും ഭ്രമണം ചെയ്യുന്ന എൻസിലാഡസ്. ഇതിന്റെ പുറംഭാഗം മഞ്ഞുകട്ടകൾ കൊണ്ട് മൂടപ്പെട്ടിരിക്കയാണ്. ഇതിനടിയിൽ ദ്രവരൂപത്തിലുള്ള ജലവുമുണ്ട്. ഇതിന്റെ താപമാനം ഭൂമിയിലെ സമുദ്രത്തിന്റെ താപത്തിനു തുല്യമാണത്രെ. സൂര്യനിൽ നിന്നു ലഭിക്കുന്ന ചൂടല്ല ഇതിനു കാരണം. ശനിയുടെ ആകർഷണം മൂലം വേലിയേറ്റ-വേലിയിറക്കങ്ങളുടെ ഫലമായി ഉണ്ടാകുന്ന ഘർഷണമായിരിക്കാം ഇതിനു കാരണമെന്നാണ് ഒരു വിഭാഗം ശാസ്ത്രജ്ഞർ പറയുന്നത്. ഇതുകൊണ്ടു മാത്രം ഇത്രയും ഉയർന്ന താപനില സംജാതമാകില്ല എന്ന അഭിപ്രയമുള്ളവരുമുണ്ട്. ഏതായാലും ഈ താപനില ജീവന്റെ നിലനില്പിന് അനുയോജ്യമായതാണ് എന്ന കാര്യത്തിൽ ആർക്കും അഭിപ്രായവ്യത്യാസമില്ല.

അനുയോജ്യമായ ഈ താപനിലയും ഭൂമിയിലെ സമുദ്രത്തിലുള്ളതു പോലെ ഉപ്പിന്റെയും ജൈവപദാർത്ഥങ്ങളുടെയും സാന്നിദ്ധ്യവും ഇവിടെ ഏകകോശജീവികൾ ഉണ്ടായിരുക്കുന്നതിനുള്ള സാദ്ധ്യതയിലേക്കാണ് വിരൽചൂണ്ടുന്നത് എന്ന് ശാസ്ത്രജ്ഞർ അഭിപ്രായപ്പെടുന്നു 


2012, മാർച്ച് 20, ചൊവ്വാഴ്ച

ചതുരവടിവിലൊരു താരാപഥം

credit: Swinburne University of Technology

ഒടുവിൽ അതും കണ്ടെത്തി! ദീർഘചതുരാകൃതിയിലൊരു താരാപഥം! ദീർഘവൃത്താകാര താരാപഥങ്ങളും സർപ്പിള താരാപഥങ്ങളുമാണ് നമുക്കേറെ പരിചിതം. റിങ് ഗാലക്സി, ലെന്റികുലർ ഗാലക്സി എന്നും അപൂർവ്വമായി കേട്ടുകാണും.  എന്നാലിപ്പോഴിതാ ദീർഘചതുരാകൃതിയിലൊരു (Rectangle Galaxy) ഗാലക്സിയും കണ്ടെത്തിയിരിക്കുന്നു.


ആസ്ട്രേലിയയിലെ സ്വിൻബേൺ സർവ്വകലാശാലയിലെ ശാസ്ത്രജ്ഞരാണ് ഈ പുതിയ കണ്ടുപിടുത്തം നടത്തിയിരിക്കുന്നത്. emerald-cut galaxy എന്നറിയപ്പെടുന്ന LEDA 074886 ഭൂമിയിൽ നിന്നും ഏകദേശം 70 ദശലക്ഷം പ്രകാശവർഷം അകലെയാണ് സ്ഥിതിചെയ്യുന്നത്. നൂറുകണക്കിനു താരാപഥങ്ങളെ കണ്ടിട്ടുണ്ടെങ്കിലും ഇതുപോലൊന്ന് ആദ്യമായി കാണുകയാണെന്നാണ് ഗവേഷകസംഘത്തിനു നേതൃത്വം കൊടുത്ത ഡോ. അലിസ്റ്റർ ഗ്രഹാം പറഞ്ഞത്.

രണ്ടു താരാപഥങ്ങൾ തമ്മിൽ സംഘട്ടത്തിലേർപ്പെട്ടതിന്റെ ഫലമായിരിക്കാം ഈ രൂപമാറ്റത്തിനു പിന്നിലെന്നാണ് ശാസ്ത്രജ്ഞരുടെ ഇപ്പോഴത്തെ നിഗമനം. സെക്കന്റിൽ 33കി.മീറ്റർ വേഗത്തിൽ കറങ്ങുന്ന ഒരു നക്ഷത്ര ഡിസ്ക് ഇതിന്റെ മദ്ധ്യഭാഗത്തായി കണ്ടെത്തിയിട്ടുണ്ട്.

കൂടുതൽ വിവരങ്ങൾ ഇവിടെ ലഭ്യമാണ്

2012, മാർച്ച് 3, ശനിയാഴ്‌ച

ഡീഓനീയിൽ പ്രാണവായു


Dione (Mond) (30823363)
കടപ്പാട്: വിക്കിമീഡിയ കോമൺസ്

ശനിയുടെ ഉപഗ്രഹമായ ഡീഓനീയിൽ [Dione (pronounced DEE-oh-nee)] ചാർജ്ജിത  തന്മാത്രാ ഓക്സിജന്റെ (O2+) സാന്നിദ്ധ്യം കണ്ടെത്തിയതായി ന്യൂ മെക്സിക്കോയിലെ ലോസ് അലാമോസ് നാഷണൽ ലബോറട്ടറിയിലെ ശാസ്ത്രജ്ഞർ അവകാശപ്പെട്ടു. ഇത് ബാഹ്യസൗരയൂഥവ്യവസ്ഥയിൽ ജീവസാന്നിദ്ധ്യം അന്വേഷിക്കുന്നവരിൽ ആവേശം സൃഷ്ടിച്ചിരിക്കുകയാണ്. Geophysical Research Letters പുതിയ ലക്കത്തിലാണ് ഈ ഗവേഷണപ്രബന്ധം (PDF) പ്രസിദ്ധികരിച്ചിരിക്കുന്നത്.

ശനിയുടെ അറിയപ്പെടുന്ന 62 ഉപഗ്രഹങ്ങളിൽ ഒന്നാണ് ഡിഓനി. ശനിയിൽ നിന്നും 1,123 കി.മീറ്റർ അകലെയാണ് ഇതിന്റെ ഭ്രമണപഥം. ധാരാളം ഗർത്തങ്ങളും കിടങ്ങുകളുമുള്ള ഈ ഉപഗ്രഹം പാറകളാലും മഞ്ഞുകട്ടകളാലുമാണ് സൃഷ്ടിക്കപ്പെട്ടിരിക്കുന്നത്. ശനിയെ ഒരു പ്രാവശ്യം ചുറ്റിവരാൻ 2.7ദിവസം എടുക്കുന്നു.

1684ൽ ജിയോവന്നി കാസ്സിനിയാണ് ഡീഓനീയെ ആദ്യമായി കണ്ടെത്തുന്നത്. ഇപ്പോൾ ഈ ഉപഗ്രഹത്തിൽ തന്മാത്രാ ഓക്സിജന്റെ സാന്നിദ്ധ്യം കണ്ടെത്തിയത് അദ്ദേഹത്തിന്റെ ഓർമ്മക്കു വേണ്ടി 1997ൽ നാസ വിക്ഷേപിച്ച കാസ്സിനി ബഹിരാകാശ പേടകവും! 2010ൽ ഈ പേടകം ഡീഓനീയുടെ സമീപത്തു കൂടി കടന്നുപോയപ്പോഴാണ് ശ്രദ്ദേയമായ ഈ നിരീക്ഷണം നടത്തിയത്.

ശനിയുടെ ശക്തമായ കാന്തികമണ്ഡലത്തിൽ നിന്നും ലഭിക്കുന്ന ഊർജ്ജം ഉപയോഗിച്ചാണത്രെ ഇവിടെ ഓക്സിജൻ തന്മാത്രകൾ രൂപം കൊള്ളുന്നത്. ശനിയുടെ കാന്തികമണ്ഡലത്തിൽ നിന്നും വരുന്ന ചാർജ്ജിതകണങ്ങൾ (charged ions) ഡീഓനീയിലെ മഞ്ഞുകട്ടകളിൽ ചെന്നിടിച്ച് അതിലെ ഓക്സിജൻ തന്മാത്രകളെ  
 സ്വതന്ത്രമാക്കി അന്തരീക്ഷത്തിലേക്കു വിടുന്നു.

ഓക്സിജനും കാർബണും തമ്മിൽ രാസബന്ധനത്തിലേർപ്പെട്ട് രൂപം കൊള്ളുന്ന തന്മാത്രകളാണ് ജീവന്റെ അടിസ്ഥാനകണങ്ങളാവുന്നത് എന്നതു കൊണ്ട് ഈ കണ്ടെത്തൽ വളരെ നിർണ്ണായകമായാണ് ശാസ്ത്രജ്ഞർ കാണുന്നത്. വ്യാഴത്തിനും ശനിയ്ക്കും ശക്തമായ കാന്തികമണ്ഡലമുള്ളതിനാലും ഇവക്കു ചുറ്റും ധാരാളം മഞ്ഞുകട്ടകൾ നിറഞ്ഞ ഉപഗ്രഹങ്ങൾ ഉള്ളതിനാലും തുടർന്നുള്ള അന്വേഷണങ്ങൾ യൂറോപ്പ, എൻസിലാഡസ് തുടങ്ങിയ മറ്റു പല ഉപഗ്രഹങ്ങളിലേക്കും വ്യാപിക്കും എന്നു കരുതാവുന്നതാണ്.

Dioneഡീഓനീ
കടപ്പാട്: വിക്കിമീഡിയ കോമൺസ്

ലോസ് അലാമോസ് ലബോറട്ടറിയുടെ പത്രക്കുറിപ്പ്

2012, മാർച്ച് 1, വ്യാഴാഴ്‌ച

മാർച്ചിലെ ആകാശവും വിശേഷങ്ങളും

2012 മാർച്ച് മാസത്തിൽ മദ്ധ്യകേരളത്തിൽ രാത്രി 8.30ന് കാണുന്ന ആകാശദൃശ്യമാണ് താഴെ കൊടുത്തിരിക്കുന്നത്.

ചിത്രത്തിൽ കർസർ വെച്ചു ക്ലിക് ചെയ്താൽ വലുതായി കാണാം

മാർച്ച് 3:- ചൊവ്വ ഏറ്റവും തിളക്കത്തിൽ കാണാം. ചൊവ്വയും സൂര്യനും ഭൂമിയുടെ എതിർദിശയിൽ.

മാർച്ച് 8:-  പൗർണ്ണമി


മാർച്ച് 14:- ഗുരു-ശുക്രസംഗമം. വ്യാഴവും ശുക്രനും തമ്മിലുള്ള അകലം 3ഡിഗ്രി മാത്രമായിരിക്കും


മാർച്ച് 20:- സമരാത്രദിനം. സൂര്യൻ ഭൂമദ്ധ്യരേഖക്കു മുകളിൽ വരുന്നു.


മാർച്ച് 22:- അമാവാസി


മാർച്ച് 25:- ചന്ദ്രനും വ്യാഴവും ശുക്രനും അടുത്തടുത്ത് വരുന്നു.

ഈ മാസത്തെ ആകാശത്തിന്റെ ഒരു വീഡിയോ ചിത്രീകരണം ഇവിടെ കാണാം.

2012, ഫെബ്രുവരി 10, വെള്ളിയാഴ്‌ച

ശുക്രൻ വേഗത കുറക്കുന്നുവോ?



നമ്മുടെ അയൽഗ്രഹമായ ശുക്രൻ അതിന്റെ നിഗൂഢതകളാൽ ശ്രദ്ധിക്കപ്പെട്ട ഗ്രഹമാണ്. ഉയർന്ന അന്തരീക്ഷമർദ്ദവും സാന്ദ്രതയേറിയതും വിഷമയവുമായ അന്തരിക്ഷവും അതിനെ മറ്റു ഗ്രഹങ്ങളിൽ നിന്നും വേറിട്ടു നിർത്തി. അന്തരീക്ഷത്തിന്റെ ഉയർന്ന സാന്ദ്രതയും മർദ്ദവും ശുക്രനെ കുറിച്ചുള്ള വിവരങ്ങൾ അറിയുന്നതിൽ നിന്നും നമ്മെ തടഞ്ഞു. അതുകൊണ്ടുതന്നെ ഈ ഗ്രഹത്തെ കുറിച്ച് മറ്റു ഗ്രഹങ്ങളെ കുറിച്ച് അറിയുന്നതിനേക്കാൾ കുറച്ചു വിവരങ്ങൾ മാത്രമേ അറിയാൻ കഴിഞ്ഞിട്ടുള്ളു. അറിഞ്ഞവയിൽ പലതും അത്ഭുതപ്പെടുത്തുവയും. ഇപ്പോൾ ഇതാ ആ കൂട്ടത്തിലേക്ക് പുതിയൊരെണ്ണം കൂടി.
ശുക്രന്റെ സ്വയം ഭ്രമണത്തിന്റെ വേഗത പ്രതീക്ഷിച്ചിരുന്നതിനേക്കാൾ കുറഞ്ഞുകൊണ്ടിരിക്കുകയാണത്രെ!

യൂറോപ്യൻ സ്പേസ് ഏജൻസിയുടെ വീനസ് എക്സ്പ്രസിൽ നിന്നും ലഭിച്ച വിവരങ്ങളിൽ നിന്നും ശാസ്ത്രജ്ഞർ കണക്കുകൂട്ടിയെടുത്തതാണിത്. നാസയുടെ മെഗല്ലൻ 1990കളിൽ തിട്ടപ്പെടുത്തിയ വിവരങ്ങളുമായി ചേർത്തുവെക്കുമ്പോഴാണ് അത്ഭുതപ്പെടുത്തുന്ന ഈ സത്യം അവർ തിരിച്ചറിഞ്ഞത്.  നാലുവർഷത്തെ മഗല്ലൻ ദൗത്യത്തിൽ നിന്നും ലഭിച്ച വിവരങ്ങൾ വിശകലനം ചെയ്തതിൽ നിന്നും ശുക്രന്റെ സ്വയംഭ്രമണസമയമായി ലഭിച്ചത് 243.0185 ഭൗമദിനങ്ങൾ എന്നായിരുന്നു. ഇതിനെക്കാൾ 6.5 മിനിട്ട് ദീർഘിച്ചതാണത്രെ ഇപ്പോഴത്തെ ശുക്രദിവസം.

ഇപ്പോൾ ലഭിച്ചിരിക്കുന്ന പുതിയ അറിവ് ശുക്രന്റെ അകക്കാമ്പ് ഉറച്ചതാണോ ദ്രവരൂപത്തിലുള്ളതാണോ എന്ന് കണ്ടെത്തുന്നതിലേക്കുള്ള വഴികാട്ടിയാകുമെന്ന് ശാസ്ത്രജ്ഞർ പറയുന്നു. ശുക്രന്റെ അകക്കാമ്പ് ഉറച്ചതാണെങ്കിൽ അത് മറ്റുഭാഗങ്ങളെക്കാൾ സാന്ദ്രത കൂടിയതായിരിക്കും. എങ്കിൽ മറ്റു ബാഹ്യശക്തികളുമായി ഇത് അധികം പ്രതിപ്രവർത്തിക്കില്ല. ശുക്രന്റെ സാന്ദ്രത കൂടിയ അന്തരീക്ഷത്തിൽ ഇതിന്റെ പ്രതിഫലങ്ങൾ കാണാനാകുമത്രെ. ഭൂമിയുടേതിനെക്കാൾ 90 മടങ്ങ് അധികമാണ് ശുക്രന്റെ അന്തരീക്ഷമർദ്ദം. ഭൂമിയുടെ സ്വയംഭ്രമണത്തിൽ കാണുന്ന മില്ലിസെക്കന്റിന്റെ വ്യതിയാനം പോലും വാണിജ്യവാതങ്ങളിലും താപനിലയിലും വ്യത്യാസങ്ങൾ ഉണ്ടാക്കുന്നുണ്ട്.

1980കളിലും 90കളിലുമായി വെനേറ, മെഗല്ലൻ എന്നീ ഓർബിറ്ററുകൾ സൃഷ്ടിച്ച റഡാർ മാപ്പുകളിൽ നിന്നാണ് ശുക്രന്റെ അതിസാന്ദ്രീകൃതവും ഉന്നതമർദ്ദമുള്ളതും വിഷകാരിയുമായ അന്തരീക്ഷത്തെ കുറിച്ചുള്ള വിവരങ്ങൾ വെളിവാക്കപ്പെട്ടത്.

വീനസ് എക്സ്പ്രസിന്റെ തുടർപഠനങ്ങൾ ഈ നിഗൂഢഗ്രഹത്തിന്റെ ഇനിയും വെളിപ്പെടാനുള്ള രഹസ്യങ്ങളിൽ പലതും തുടർന്നുള്ള വർഷങ്ങളിൽ പുറത്തുകൊണ്ടുവരുമെന്ന് പ്രതീക്ഷിക്കാം. അത്ഭുതങ്ങൾക്കു വേണ്ടി നമുക്കു ജിജ്ഞാസുക്കളാകാം.


2012, ഫെബ്രുവരി 2, വ്യാഴാഴ്‌ച

2012, ജനുവരി 29, ഞായറാഴ്‌ച

ചുവന്ന ഗ്രഹത്തിന്റെ ജാതകം മാറ്റിയെഴുതിയ എട്ടു വർഷങ്ങൾ


വർഷങ്ങൾക്കു മുമ്പ് ചൊവ്വ ഭൂമിയിലുള്ളവർക്ക് ഒരത്ഭുതഗ്രഹമായിരുന്നു. ചൊവ്വാമനുഷ്യനെ കുറിച്ചും പറക്കും തളികകളെ കുറിച്ചുമുള്ള ധാരാളമായി വന്നുകൊണ്ടിരുന്നു. ഇവയെല്ലാം നേരിട്ടു കണ്ട മനുഷ്യർ പോലുമുണ്ടായി. പത്രങ്ങളിൽ ഇടക്കിടെ വാർത്തകൾ വന്നുകൊണ്ടിരുന്നു. ഇതിനെല്ലാം ഒരു പ്രധാനകാരണമായി വർത്തിച്ചത് ചൊവ്വയിൽ വെള്ളമൊഴുകുന്ന തോടുകളുണ്ടെന്ന സ്ഥിരീകരിക്കാത്ത ഒരു വാർത്തയായിരുന്നു. ഭൂമിയിൽ നിന്നുള്ള നിരീക്ഷണത്തിൽ നിന്നും അവിടെ കണ്ട ചാലുകളെ തെറ്റിദ്ധരിച്ചതിന്റെ ഫലമായിരുന്നു ഇത്. ഇതിനെ പൊലിപ്പിക്കാൻ പത്രങ്ങളും കല്പിതകഥാരചനക്കാരും ധാരാളമായുണ്ടായി. മനുഷ്യനെക്കാൾ ഉയർന്ന ജീവികളും വലിയതോതിലുള്ള കൃഷിയുമുണ്ടെന്നുവരെ ഇക്കൂട്ടർ പറഞ്ഞു പരത്തി. സാധാരണജനങ്ങൾ പലപ്പോഴും തെറ്റിദ്ധരിപ്പിക്കപ്പെട്ടു. കാരണം ചൊവ്വയെപറ്റി അപ്പോഴും കാര്യമായ വിവരങ്ങളൊന്നും ലഭ്യമല്ലായിരുന്നു. ഇതിനൊരന്ത്യം കുറിക്കുന്നതിന്റെ തുടക്കമായിരുന്നു 2004 ജനുവരി 24ന് ചൊവ്വയുടെ പ്രതലത്തിൽ ഓപ്പർച്യൂണിറ്റി എന്ന പേടകത്തിന്റെ ലാന്റിങ്. മൂന്ന് ആഴ്ചകൾക്കു ശേഷം ഇതിനു കൂട്ടായി സ്പിരിറ്റ് എന്ന പേടകവും ചുവന്ന ഗ്രഹത്തെ സ്പർശിച്ചു. തുടർന്നിങ്ങോട്ട് ചൊവ്വയെ കുറിച്ചുള്ള പുത്തനറിവുകൾ ഭൂമിയിലേക്കൊഴുകിക്കൊണ്ടിരുന്നു. ചൊവ്വയിൽ സഞ്ചരിച്ച് വിവരങ്ങൾ ശേഖരിക്കാൻ കഴിയുന്ന റോവറുകളായിരുന്നു ഇവ രണ്ടും. കൃഷിയും കൃഷിക്കാരും അവിടെയെങ്ങും ഇല്ലായിരുന്നു.


ഇതൊക്കെയാണെങ്കിലും ചൊവ്വയെ ഒരു വരണ്ട ഗ്രഹമായാണ് ശാസ്ത്രലോകം മുദ്രകുത്തിയിരുന്നത്. ഈ രണ്ടു വിശ്വാസങ്ങളെയും തകർക്കുന്നതിൽ ഓപ്പർച്യൂണിറ്റി, സ്പിരിറ്റ് ഇരട്ടകൾ പ്രധാന പങ്കാണ് വഹിച്ചത്.


പൂർവ്വകാലത്തിലെങ്ങാനും ചൊവ്വയിൽ ജലത്തിന്റെ സാന്നിദ്ധ്യമുണ്ടായിരുന്നോ എന്നന്വേഷിക്കുന്നതിനു വേണ്ടിയുള്ളതായിരുന്നു ഓപ്പർച്യൂണിറ്റി, സ്പിരിറ്റ്  ദൗത്യം. ഇക്കാര്യത്തിൽ നിർണ്ണായകമായ പലവിവരങ്ങളും ശേഖരിക്കാൻ ഈ ദൗത്യത്തിനു കഴിഞ്ഞു. ഇവ ചൊവ്വയെ കുറിച്ച് ശാസ്ത്രജ്ഞരിലുണ്ടായിരുന്ന ധാരണകൾ പലതും തിരുത്തിക്കുറിക്കുന്നതിനുള്ള കാരണങ്ങളായി മാറുകയായിരുന്നു പിന്നീട്. ഉദാഹരണത്തിന് സ്പിരിറ്റ് കണ്ടെത്തിയ ചില വിവരങ്ങൾ ചൊവ്വയിൽ പുരാതനകാലത്ത് ഹൈഡ്രോതെർമ്മൽ വ്യവസ്ഥ നിലനിന്നിരുന്നതിനുള്ള ശക്തമായ തെളിവുകളായിരുന്നു. ജീവന്റെ നിലനില്പിനാവശ്യമായ പ്രാഥമിക ഘടകങ്ങളായ ജലവും ഊർജ്ജവും ഉണ്ടായിരുന്നു എന്നതിനുള്ള തെളിവു കൂടിയായിരുന്നു ഇത്. ഓപ്പർച്യൂണിറ്റി അടുത്തകാലത്ത് അവിടെ ചുടുനീരുറവകൾ ഉണ്ടായിരുന്നതിനുള്ള തെളിവുകളും കണ്ടെത്തിയിട്ടുണ്ട്.

ദൗർഭാഗ്യവശാൽ 2009 മെയ് മാസത്തിൽ സ്പിരിറ്റിന്റെ ചക്രങ്ങൾ ചൊവ്വയിലെ മണലിൽ താഴ്ന്നു പോകുകയും അത് ഒരു വശം ചെരിഞ്ഞ് വീഴുകയും ചെയ്തു. ഇതു ശരിയാക്കുന്നതിലും സോളാർ പാനലുകൾ സൂര്യാഭിമുഖമാക്കുന്നതിലും അതിലെ കമ്പ്യൂട്ടർ പരാജയപ്പെടുകയായിരുന്നു. 2010 മാർച്ച് മാസത്തോടെ സ്പിരിറ്റുമായുള്ള എല്ലാ ബന്ധങ്ങളും ഭൂമിക്കു നഷ്ടപ്പെട്ടു. 2011 മെയ്‌മാസത്തിൽ സ്പിരിറ്റിന്റെ മരണവാർത്ത നാസ സ്ഥിരീകരിച്ചു.

മൂന്നു വർഷം കൊണ്ട് 22 കി.മീറ്റർ യാത്രചെയ്ത്  2011 ആഗസ്റ്റ് മാസത്തിൽഓപ്പർച്യൂണിറ്റി എൻഡവർ ഗർത്തത്തിനു സമീപത്തെത്തി. ഇതിന്റെ അരികുകളിൽ തുളച്ചു പരിശോധിച്ചു. ചൊവ്വയിൽ ജലമുണ്ടായിരുന്നു എന്നതിനുള്ള ഏറ്റവും നല്ല തെളിവുകൾ ഇവിടെ നിന്നാണത്രെ ലഭിച്ചത്.

ഡിസംബറിൽ ഓപ്പർച്യൂണിറ്റി പുതിയൊരു സ്ഥലം തുടർപഠനങ്ങൾക്കായി കണ്ടെത്തി. ഗ്രീലി ഹാവൻ എന്ന പ്രദേശത്ത് പുറത്തേക്ക് തള്ളിനിൽക്കുന്ന ഒരു പാറയിൽ അതിന്റെ പഠനപ്രവർത്തനങ്ങൾ തുടർന്നു. നിശ്ചലമായി നിൽക്കുകയാണെങ്കിലും ചൊവ്വയിലെ ഈ ശൈത്യകാലത്തും ഓപ്പർച്യൂണിറ്റി അതിന്റെ ജോലി തുടർന്നുകൊണ്ടിരിക്കുക തന്നെയാണ്. അതിന്റെ സോളാർ പാനലുകൾ പൂർണ്ണമായി സൂര്യന്റെ നേരെ തിരിച്ചുവെച്ച് പരമാവധി ഊർജ്ജം സമാഹരിച്ചുകൊണ്ടാണ് ഇതു സാധിക്കുന്നത്.
മാർച്ച് മാസത്തോടെ ചൊവ്വയിലെ ശൈത്യകാലം അവസാനിക്കുമ്പോൾ ഓപ്പർച്യൂണിറ്റി വീണ്ടും ചലിച്ചുതുടങ്ങും. അതു കണ്ടെത്തിയ പുതിയ നിരീക്ഷണസ്ഥാനത്തേക്ക്. അപ്പോൾ സൂര്യപ്രകാശം കൂടുതൽ ശക്തിയോടെ ചൊവ്വയിലെത്തുന്നുണ്ടാവും. ഇപ്പോൾ അതു സ്ഥിതിചെയ്യുന്ന എൻഡവർ ഗർത്തത്തിന്റെ തെക്കുഭാഗത്ത് മൂന്ന് കി.മീറ്റർ അകലെ കിടക്കുന്ന കേപ് ട്രിബുലേഷൻ എന്ന പ്രദേശത്തേക്കായിരിക്കും അതിന്റെ യാത്ര. ചൊവ്വയെ ഭ്രമണം ചെയ്യുന്ന പേടകങ്ങൾ ഈ പ്രദേശത്ത് കളിമൺധാതുക്കൾ കണ്ടെത്തിയിട്ടുണ്ട്. ഇവിടെ നിന്നും ചൊവ്വയുടെ പൂർവ്വചരിത്രത്തെ കുറിച്ച് കൂടുതൽ വിവരങ്ങൾ ലഭിക്കുമെന്ന് പ്രതീക്ഷിക്കാം.

ഭൂമിക്ക് പുറത്തുള്ള മറ്റൊരിടത്ത് ഏറ്റവും കൂടുതൽ ദൂരം സഞ്ചരിച്ച റോബോട്ട് നിയന്ത്രിത ഉപകരണം എന്ന ഖ്യാതി ഇപ്പോഴുള്ളത് സോവിയറ്റു യൂണിയന്റെ ലൂണൊഖോദ് 2നാണ്. ചന്ദ്രന്റെ പ്രതലത്തിൽ 1973ൽ 37കി.മീറ്റർ ദൂരം സഞ്ചരിച്ചാണ് ഈ റെക്കൊഡ് സൃഷ്ടിച്ചത്. ഓപ്പർച്യൂണിറ്റിയുടെ ഓഡോമീറ്ററിൽ ഇതു വരെ സഞ്ചരിച്ച ദൂരം അടയാളപ്പെടുത്തിയിരിക്കുന്നത് 34.4കി.മീറ്റർ ആണ്. മൂന്നു കി.മീറ്റർ കൂടി സഞ്ചരിച്ചാൽ ലൂണോഖോദിന്റെ റെക്കോഡ് മറികടക്കും. പുതിയ ലക്ഷ്യസ്ഥാനമായ കേപ് ട്രിബുലേഷനിൽ എത്തുമ്പോൾ അതു സംഭവിക്കും.

ചൊവ്വയിൽ പണ്ടെന്നെങ്കിലും ചെറിയ പച്ചത്തുരുത്തുകൾ ഉണ്ടായിരിന്നേക്കാമെന്നും അതിനുള്ള തെളിവുകൾ ലഭിക്കുമെന്നുമുള്ള പ്രതീക്ഷ ഒരുവിഭാഗം ശാസ്ത്രജ്ഞരിലുണ്ട്. ഏകകോശജീവികൾ ഉണ്ടായിരുന്നതിനുള്ള തെളിവുകൾക്കു വേണ്ടിയും ശാസ്ത്രലോകം കാത്തിരിക്കുന്നു. ജലമുണ്ടായിരുന്നതിന്റെയും ഊർജ്ജോല്പാദനം നടന്നിരുന്നതിന്റെയും തെളിവുകൾ ഇതിനുള്ള സാധ്യതയെ ഉറപ്പിക്കുന്നു.



Get

Blogger Falling Objects